曉明哥特登試排隊逼過關

收緊自由行的議題炒到興烚烚之際，西環一哥、中聯辦主任張曉明「微服」巡上水同羅湖關口，睇嚟係想深入基層了解吓自由行政策的影響。

Ariel索吓料，知道曉明哥昨日午飯過後，大約二點去到上水，沿住最受水貨客影響的幾條街睇吓，見到有咁多藥房，曉明哥走入啲藥房，問老細生意點，之後又入咗間茶餐廳想聽吓市民講水貨客點樣影響佢哋生活，聞說入藥房同茶餐廳都係冇事先安排，臨時決定入去傾偈，聽講啲市民反映意見時都算平和理性。

之前都有唔少報道話，水貨客逼滿由上水去羅湖的火車上，曉明哥亦都試坐東鐵，在上水站拍八達通入閘(睇怕佢來港咁耐咁鬼忙，都好少有機會試「嘟」八達通啦)，去到羅湖就唔行優先通道，特登同過關的市民一齊排隊，試吓點逼兼睇吓海關點樣檢查。

接近曉明哥的人報料，昨日走一轉後，曉明哥都有啲個人感受，好似排隊過關時遇到跨境學童，見到佢哋人仔細細揹住個大書包，都幾有感觸，又睇到兩地出入境人員點樣優先處理呢啲學童。

另外令曉哥好有印象的係，喺香港同內地關口一出一入，佢話好感受到香港出入境自動化比內地高，亦比內地好，親身體驗到香港方面點樣用科技配合便利通關。

睇嚟呢次曉明哥收穫都唔少喎。

Ariel

** 博客文章文責自負,不代表本公司立場 **

遠在英國出席阿女畢業禮的CY更新特首網誌，劈頭第一句就話自已周二午夜離開香港，然後加括號話(午夜機不會是去北京罷？)，明係針對揣測佢要上京接旨的傳聞。

 

口痕友注意力都喺幅全家合照，尤其係引起「自殘」揣測的二女齊昕身上，相中齊昕貼住阿爸企，笑笑口，希望佢的情緒問題無事啦。

查實CY篇文用咗幾多篇幅講佢今次飛英國，只係瞓咗一晚，兩晚就喺飛機上過，由此講到航空業發展，認為高效率，處理量大的機場係城市競爭力的一部份。

雖然CY無講到出口，但係依家機場第三條跑道的議題正係炒到興烚烚，機管局認為第三跑道就係應付未來增加的流量，CY話到航空業係大城市經濟不可或缺的一部分，仲話香港機場依家好好，但處理能力問題開始受關注，將來問題會更突出，似有撐第三跑道的意思喎。