立法會財委會終於通過新界東北前期撥款，由於財委會主席吳亮星星爺的能力高到咁，政府真係怕捉住佢隻手，佢都推唔到個議案去表決。
昨日真係寫晒劇本俾佢，叫佢一步步咁推進，而一開局建制派就由林大輝做聲勢話星爺唔夠強硬，俾個位佢揸正嚟做。另一方面民建聯大佬譚耀宗頂住班建制派，唔俾佢地走散。
咁陣容幫星爺，佢初段仍搞出事，壞就壞在泛民議員梁耀忠提出規程問題時，梁耀忠行事未算太離譜，星爺都要趕佢出場，搞到泛民有機會起哄保護梁耀忠，終於休會後有人教路，星爺收回決定平息事件。
財委會初段亂成咁，政府中人都擔心今次又搞唔掂，幸好捱捱吓終於捱到去表決通過。
政壇高人分析，新界東北發展無可能唔搞，否則8、10年後公屋、居屋、私樓全部都唔夠，受苦的只是市民。泛民議員初時都無咁激，隨著立法會外反對活動在三、四個星期前升溫，泛民在會內也愈來愈激，唔玩夠唔肯走，但問心講泛民中的溫和派亦擔心玩瓜咗撥款自己要受靶，所以有相當一部份人其實唔係想玩到咁絕。衰在星爺無能力控制局面，無法在窄窄地的空間中走過。
不過好囉，捱埋今屆會期，立法會放暑假後，財委會選過主席，我睇無論建制派或反對派，都無人會選星爺留任啦。
Ariel
** 博客文章文責自負,不代表本公司立場 **
中聯辦曉明哥到上水「落區」睇自由行的影響，成為政壇八卦友的話題，知情人士話中聯辦出稿時好小心，特別強調曉明哥今次深入基層了解的全部都係同自由行有關的情況。
知情者強調，一般民生政策係特區自治範圍的事，今次曉明哥落區只係圍繞著自由行，而自由行係中央決定的政策，作出調整的話，需要同香港商量，一齊睇啲數據之餘，亦要了解對業界、商界、市民的影響，向中央有關部門匯報。
Ariel講番小小歷史，話說今年三月兩會期間，人大代表田北辰提出要減吓自由行，當時全國人大委員長兼港澳協調小組組長張德江即刻責成有關部門調查研究，講吓好似研究咗好耐吓喎，知情者就話確實需要過程，包括要搜集一啲數據，例如一簽無限行，一簽幾行等等不同簽證的內地人出入境的數字，要啲時間收集。
老實講2003年推出自由行時，兩地都覺得有利，只係政策已實行成十年，實在係時候需要檢討。據了解，阿爺都睇到呢壇嘢，喺香港內部爭論好大，旅遊同零售業當然支持繼續開多啲自由行啦，但同時亦都知道隨著愈來愈多自由行旅客，港人的日常生活、一啲貼身利益係受到影響，所以都要諗吓偈點樣平衡呢兩種聲音，希望唔好因為政策調整而令受惠行業受太大衝擊，亦都唔想市民的生活受到太多的影響。
收緊就事在必行，但聽落阿爺的決定應該會係中間落墨，除咗一簽多行會收緊，阿爺都要有注意到一簽幾行的情況，早前已消息話商務一年一簽多行的簽證，都有機會收緊。
