西環出稿小心翼翼

中聯辦曉明哥到上水「落區」睇自由行的影響，成為政壇八卦友的話題，知情人士話中聯辦出稿時好小心，特別強調曉明哥今次深入基層了解的全部都係同自由行有關的情況。

  

知情者強調，一般民生政策係特區自治範圍的事，今次曉明哥落區只係圍繞著自由行，而自由行係中央決定的政策，作出調整的話，需要同香港商量，一齊睇啲數據之餘，亦要了解對業界、商界、市民的影響，向中央有關部門匯報。

Ariel講番小小歷史，話說今年三月兩會期間，人大代表田北辰提出要減吓自由行，當時全國人大委員長兼港澳協調小組組長張德江即刻責成有關部門調查研究，講吓好似研究咗好耐吓喎，知情者就話確實需要過程，包括要搜集一啲數據，例如一簽無限行，一簽幾行等等不同簽證的內地人出入境的數字，要啲時間收集。

老實講2003年推出自由行時，兩地都覺得有利，只係政策已實行成十年，實在係時候需要檢討。據了解，阿爺都睇到呢壇嘢，喺香港內部爭論好大，旅遊同零售業當然支持繼續開多啲自由行啦，但同時亦都知道隨著愈來愈多自由行旅客，港人的日常生活、一啲貼身利益係受到影響，所以都要諗吓偈點樣平衡呢兩種聲音，希望唔好因為政策調整而令受惠行業受太大衝擊，亦都唔想市民的生活受到太多的影響。

收緊就事在必行，但聽落阿爺的決定應該會係中間落墨，除咗一簽多行會收緊，阿爺都要有注意到一簽幾行的情況，早前已消息話商務一年一簽多行的簽證，都有機會收緊。

Ariel

** 博客文章文責自負,不代表本公司立場 **

收緊自由行的議題炒到興烚烚之際，西環一哥、中聯辦主任張曉明「微服」巡上水同羅湖關口，睇嚟係想深入基層了解吓自由行政策的影響。

Ariel索吓料，知道曉明哥昨日午飯過後，大約二點去到上水，沿住最受水貨客影響的幾條街睇吓，見到有咁多藥房，曉明哥走入啲藥房，問老細生意點，之後又入咗間茶餐廳想聽吓市民講水貨客點樣影響佢哋生活，聞說入藥房同茶餐廳都係冇事先安排，臨時決定入去傾偈，聽講啲市民反映意見時都算平和理性。

之前都有唔少報道話，水貨客逼滿由上水去羅湖的火車上，曉明哥亦都試坐東鐵，在上水站拍八達通入閘(睇怕佢來港咁耐咁鬼忙，都好少有機會試「嘟」八達通啦)，去到羅湖就唔行優先通道，特登同過關的市民一齊排隊，試吓點逼兼睇吓海關點樣檢查。

接近曉明哥的人報料，昨日走一轉後，曉明哥都有啲個人感受，好似排隊過關時遇到跨境學童，見到佢哋人仔細細揹住個大書包，都幾有感觸，又睇到兩地出入境人員點樣優先處理呢啲學童。

另外令曉哥好有印象的係，喺香港同內地關口一出一入，佢話好感受到香港出入境自動化比內地高，亦比內地好，親身體驗到香港方面點樣用科技配合便利通關。

睇嚟呢次曉明哥收穫都唔少喎。