政府轟「鬍鬚曾」無申報做節目 雙方無溝通無面俾

前財政司司長曾俊華在兩間電台開咪，接受港台邀請做電視節目《香港故事》擔任主持，另外逢周日亦有在商台做音樂節目《薯片鬚MUSIC》嘉賓主持，因兩份主持工作都無受薪，鬍鬚曾並無向「前任行政長官及政治委任官員離職後工作諮詢委員會」申報。但政府顯然不同意這種做法，公開作出批評。

政府發言人表示，特首辦曾經以電郵提醒港台管理層有關情況，但強調僅屬提醒性質，不存在任何打壓意圖。發言人又指，政府認為曾俊華曾擔任政府要職，職位性質敏感，為釋除公眾疑慮應作出申報，否則整個高官離職後工作申報機制，形同虛設。

但曾俊華一方反駁自己為商台、港台主持節目都無受薪，是純粹的社會服務，強調委員會只要求前特首或前官員「就業、出任董事以及合伙人」等才需申報。

無受薪算不算「就業」，是爭拗焦點。但高人話事件顯曾俊華和現政府十分唔friend，否則佢唔收錢做事，都可以事先打打招呼。而政府覺得曾俊華犯例， 亦可私下提醒。

如今證明雙方並無溝通， 政府唔止「提醒」同屬政府部門的港台，唔好用未向政府申報的曾俊華做主持，仲公開批評曾俊華無申報，都可以話無面俾啦。

Ariel

** 博客文章文責自負,不代表本公司立場 **

2017年度勳銜頒授典禮今日在禮賓府宴會廳舉行，共有331人獲授勳，現屆政府3位司長等12人獲頒授最高榮譽的大紫荊勳章，是自1998年以來最多。

禮賓府今日上、下午都好熱鬧，上午先頒大紫荊勳章，一段時間無公開露面的純官鄭家純都有出席授勳儀式，同樣獲頒大紫荊勳章的羅康瑞帶埋太太朱玲玲出席，呢位前港姐仍然靚盡全場。

三位司長中張建宗同袁國強在頒授儀式後都有到禮賓府前草坪俾傳媒拍照採訪，分享一下喜悅之情，唯獨不見財爺陳茂波。

政府新聞網圖片

原來陳茂波前日去咗越南，出席亞太經合組織財長非正式會議。政壇八卦友笑言，又會咁啱得咁蹺，官場中一直傳聞今屆特首同財爺唔係咁啱Key，本來今日可以見到林鄭頒授大紫荊勳章俾陳茂波的場景，但波哥咁啱在外公幹，攝記無緣拍到呢張合照啦。