政事
立法會今日在特首答問大會爆毓民掟杯事件，昨日就在人民力量不斷點人數的「拉布」策略下流會，只能用一個「亂」字來形容，本年度立法只剩幾天會議，未過的法案都危危乎啦。
如今積壓的法案有好多，包括激進泛民擺明要用拉布去招呼佢的成立創新及科技、「樓市辣招」(即雙倍印花稅)等草案，睇嚟科技局都無望在本屆會期通過，政府要集中火力救其他草案。
聞說政府的策略是先過容易的草案，「樓市辣招」草案爭取在本月15日晚，即今個立法年度最後一次會議通過。
若按過去的邏輯，「樓市辣招」呢啲涉及民生的草案，議員一般都唔敢搞瓜佢，但如今激進泛民玩嘢無乜底線，搞嘢亦唔奇。最弊就係工商界議員本身都有不少人反對雙倍印花稅，佢地唔使主動出招，只要在點人頭時行遲幾分鐘入去，一流會就玩完。立法會中人話，過去佢敢講「樓市辣招」草案應該有驚無險，而家就話唔敢包啦。
Ariel
** 博客文章文責自負,不代表本公司立場 **
佔中公投及7.1上街後，自由黨田少又發作，好似想郁CY咁款。田少昨日特登在佢自己facebook貼咗年初去拜神照片，仲話：「如果求神可以令到香港同以前沒有思歪的日子一樣，咁我年初喺車公廟拜神時應該誠心啲呀，哎。」
田少後來對傳媒解釋，佢facebook係由黨內青年團幫佢貼啲新嘢，所以搵張舊相嚟貼，佢只係最想祈求香港好啲。
不過田少亦觸及CY的敏感話題，認為而家經濟較03年好，但遊行人數竟創近年新高，遊行市民針對一國兩制的矛盾，而CY作為特首要擔當中央和香港市民的橋樑，好似不太稱職，政改是政府首要任務，佢仲問「如果政改通過唔到，特首係唔係要考慮辭職呢？」
但全國政協常委陳永棋就講相反方向的話，棋哥相信，CY「一定不會」因為大遊行而下台，皆因市民不單是因為梁振英因素而上街，中央也不會因為佔中投票或遊行人數多而接納公民提名，中央已「退無可退」咁話。
Ariel覺得田少講的2003年一幕會否重演，主要睇中央企唔企硬，而家睇中央立場咁硬，點會炒特首承認自己一方有問題呢?
