前朝人馬與梁粉之爭在機管局內不斷擴散，主席張建東和董事羅康瑞炒大鑊，真係精彩過睇TBB連續劇，而且有排未做完。
早前政府再委任機管局主席張建東續任一年，由原本任期至2014年5月，延至2015年5月，外界以為這個張、羅之爭會告一段落，因為一直傳聞特首CY委任羅康瑞入機管局是接張建東個位，接位不成，仲唔散場?
原來劇情比想像中曲折。政府的確不是太順張建東，因為以他為首的前朝委任機管局人馬，一直反對機場旁的高球地改建商廈，而這個建議卻獲CY支持，即係話特首和機管局主席唔係咁啱咀型。
聞說政府的確想換主席，更曾和剛卸任醫管局主席的肥胡胡定旭接觸，不過「精過無尾蛇」的肥胡雖然好有興趣做重磅公職，但要去機管局和羅康瑞行孖咇，和局內舊人對打，佢又唔係好想，所以婉拒咗。無幾耐政府就宣布俾張建東做多一年。
知情人士話，政府或者起初真係想搵康瑞代建東，但無諗過佢兩個會炒到咁大鑊。後來機管局行政總裁許漢忠又唔撈，怕變動太大，機管局更亂，所以就想搵個貎似唐粉其實一早轉咗食梁粉的肥胡去頂檔，實行中間落墨，點知肥胡咁細膽，俾件好嘢佢都唔敢食。所以唯有叫張建東續任一年，拖一拖先。呢場好戲未完噃。
巴士的團隊
Ariel
** 博客文章文責自負,不代表本公司立場 **
幾個月前傳出前民主黨成員馮煒光將出任新聞統籌專員(IC)，惹起民主黨前「自己友」一番質疑，最近有週刊更表示馮煒光會大熱墮馬，仲講到資深傳媒人潘麗瓊、商台新聞總監陳淑薇和Roadshow營運總裁盧瑞盛都係接任人選，不過我地求證過後，三個人無一個似，消息話馮煒光仍然係大熱，IC人選好快公布。
經過添馬艦見到知情人士，講起馮煒光事件。佢話外界以為鬧兩句CY就會轉軚不搵馮煒光做IC，就真係唔太了解特首囉。而且呢個年代大風大雨，要搵人做IC並非易事，正所謂唔夠資格想去做的人好多，夠資格又想做的人就無乜幾多，而上任專員鄧惠鈞早於六月已離任，都唔適宜拖咁耐啦。
週刊傳馮煒光墮馬，CY另外搵人，不過我地直接間接搵過三個當事人，個個都否認，仲係提高八度去否認嗰隻。潘麗瓊話「戇居，作嘢，有乜好做? 唔會做。」
陳淑薇大大聲話：「我何德何能?」(其實佢德能俱備，不過唔想落水啫)。盧瑞盛就：:「得啖笑。」佢地個個講到咁實，唔係左避右避，一啲都唔似傾緊囉。
我地怕添馬艦知情人士未夠堅，再搵權威人士問一問，佢拋咗一句：「好快會公布」。需知做IC品格審查都要搞兩個月，而家除咗馮煒光之外，其他所謂人選十劃未有一撇，點樣「好快公布」?
馮煒光當日講過他必要時能做政府發言人，「類似白宮發言人之類」。外界好想睇吓如果佢咁搞會爆出乜嘢好戲，知情人士話估佢當時都係隨口講，未必太認真，唔好話日日開記者會代政府發言，即使一個星期開一次「白宮發言人式」記者會，都唔易講，因為啲好料在各局和部門之中，佢地有攞到分的好嘢，點解要放俾IC講唔自己講？結果好易出現衰嘢叫專員講，好嘢留番俾自己講的慘況，例如商務局局長蘇錦樑唔想俾人質電視台發牌，就叫馮專員你代我出去講講啦。咁搞法個專員幾打得都好，打三五七鑊實會死。結論係記者朋友唔好太寄望去「白宮記者會」鋤馮專員嘞。
聽完佢咁講，我只能講三個字：大失所望囉。
巴士的團隊
