壹傳媒（282）出售港台《壹週刊》搞咗半年，最後爛尾收場，期間公司出的通告混混亂亂，成為世紀騎呢交易，當日拍枱反對肥佬黎這樣出售《壹週刊》的前壹仔老總黃麗裳，證實最有遠見。
《蘋果日報》訪問黃麗裳，佢直言：「Day 1就已經諗到唔會得啦。」黃麗裳話去年7月宣佈賣盤時已有預感可能有今日，現時有個「了斷」也是好事。
想當日壹傳媒管理層向壹仔高管宣布賣盤消息，黃麗裳淚灑當場，拍枱反對公司的決定，但壹傳媒老細當時一意孤行，黃麗裳憤然離職。如果壹傳媒當時聽咗佢講，就唔使搞到咁亂。而家雖然想沒收買家的8000萬保證金，但對方一定唔同意，未來隨時還有連番訴訟，真係早知今日，何必當初。
壹傳媒未完成交易就將《壹週刊》交俾買家去做，如今再要收番嚟搞，又請番原來的副社長兼總編輯黃麗裳回來做社長，區嘉儀做總編輯。本書俾人搞咗半年，又要重頭嚟過，再部署究竟做書還是專心做網。
黃麗裳指，現有做《壹週刊》的人手將會全數過檔，但她昨日才接到委任，初步了解約有數十人，但暫無計劃增聘。她認為，《壹週刊》之前是營運出現問題，並非只牽涉數碼化轉型，料壹傳媒新管理層上任後，重新制訂營運策略，會帶來一番新氣象。
小鯊
** 博客文章文責自負,不代表本公司立場 **
壹傳媒（00282）公布，出售《壹週刊》予商人黃浩的交易，因為未收到買方承諾支付的資金，交易宣告終止。這個可以說是世紀騎呢交易，咁大間上市公司，簽晒約出晒通告，最後交易竟然可以唔成功，真係離奇過離奇，成件事起碼有四個離奇位，仲需要佢哋解釋。
第一，壹傳媒究竟有冇收到6000萬訂金？壹傳媒開始的時候話收到4000萬訂金，後來話訂金數目增加到2000萬，夾埋6000萬。但街外有傳聞這筆錢是放在律師樓，並未發放給壹傳媒，究竟壹傳媒有冇收過6000萬現金落袋呢？
第二，壹傳媒為何不在交易完成後，才轉移資產俾對方？壹周刊一早就出咗一個封面題為「壹個時代的終結」的告別作，之後就交咗比買家黃浩去營運，問題係賣盤交易尚未完成，點解要咁早將成盤生意交比人家去玩？
第三，壹傳媒有冇代出人工？壹傳媒將盤生意在交易尚未完成之前，先交俾人家去做，問題係究竟對方已經開始支付員工嘅工資及印刷費等開支，抑或仍然由壹傳媒去支付呢？
第四，壹傳媒點解冇收到1.48億，又信有收到錢呢？壹傳媒一早聲稱對方已支付的交易款項，宣布交易完成。但後來又再發通告還未收到錢，表面的理由是收到對方的匯款證明，就以為收到錢。作為上市公司，點解壹傳媒咁容易就相信已收到錢呢？
無論如何，壹傳媒的股東如信晒上市公司公布的交易通告，以為公司可以用3.2億賣走壹周刊，以為交易已經完成，點知最後突然泡湯，今次真係中晒棍啦。
