良家婦女跑私鐘

我從前當差時，在旺角總區做副行動主任，其中一個職責是掃黃，最近和朋友吃飯，他問起我掃黃的經驗，有什麼感受特別深的東西，我就講了一些掃黃感想。

大家睇粵語長片時，睇到好多「逼良為娼」的故事，其實現代社會，根本好少逼良為娼的故仔，反而我做掃黃時，是想「逼娼為良」，叫性工作者不要貪圖高收入，早早行番正途啦。

黃色事業要拉拉唔晒，要鎖鎖唔晒，但我最想解決的是「私鐘妹」的問題。有人投身淫業集團，唔係做妓女，只係跑私鐘，即係唔開門做生意，只係俾人包一段時間，由集團介紹佢地俾大老闆包，少則一兩個月，多起上來長包都有。呢啲「私鐘妹」做的是大生意，自然是我地想重力打擊的對象。

不過查案查落去，你就會發覺呢個世界千奇百怪，跑私鐘的不止是學生妹，還有婦女，仲有睇起上來十分高貴的良家婦女。呢啲女士平日係你望佢多兩眼佢會告你非禮嗰隻，點知私底下都有做。當然，亦係賣到最高身價，我見過最誇張的例子，係可以做兩年收300幾萬。淫業集團出得300幾萬糧俾良家婦女，當然不是為慈善，而係操控佢做生意，俾咗咁多錢佢，還可以獲厚利，生意幾大，可想而知。如果唔係大破淫業集團，起埋佢個電腦，查晒裏面的資料，你點估都估唔到，有「良家婦女跑私鐘」的故事。

我知道這件事，第一個反應是O晒咀，問題不是淫業鉅子，佢地做乜都睇成生意啫。我反而覺得，最大問題是跑私鐘的婦女，她出身良好，真係唔知做乜要和淫業鉅子走埋一齊? 而且良家婦女本來家庭收入都好高，為乜仲要出來做呢? 究竟是衰大洗，還是衰貪心? 或許她以為做呢啲嘢神不知鬼不覺，賺咗錢無人知，誰不知呢個世界「若要人不知，除非己莫為」。

事情的表皮一撕破，街坊的睇法唔同晒，平日良家婦女高貴的形象，如今蕩然無存，見佢行過都眼超超，心諗你好似咁高貴，都係出來做啫，暗中做同擺明做，本質上無分別呀。

我覺得呢個世界，萬惡離不開一個貪字。你可能會話佢做乜咁cheap? 但你未試過面對咁情境，遇上淫業鉅子，佢300萬一張支票開過來，俾著你是否頂得住唔收。你頂唔順，就唯有賣身俾人，受人錢財，幫人搵錢。即使我做過掃黃，但要救呢啲良家婦女出火坑，一啲都唔易呀。

黃毅力

** 博客文章文責自負,不代表本公司立場 **

在香港這個物質社會生活，不論是學生、職場新鮮人、老闆、上市公司主席、政治領袖或是特首，都會在乎別人怎樣看自己。

別人對你有正向思維或是有信心，你做每件事或說每句話，都會得到別人的認同或是支持，亦不需要額外付出金錢或任何其他代價，所以「名聲」在我們的社會中，是十分重要。

我小時候也很在乎別人的眼光，但長大後已經改變了。做警察的時候，會怕別人認為我不夠學歷，所以我工作能力要比別人強；因為我年紀輕，工作了兩年就已經做到了「兩粒一辦」，當時只不過是21歲，所以我就扮老積，帶金絲眼鏡，沉色恤衫、西裝，總之，外表就要比真實年紀大廿年，那麼那些老前輩就可以信服我。我做生意開始起步時，怕銀行唔借錢，又怕其他人睇我唔起，因為經驗唔夠，冇信心，我就帶「金勞」、帶卡地亞名牌眼鏡，仲要揸架貴車，時常保持著自己身光頸靚。

但時至今天，年紀已差不多50歲了，回頭看看，一切都是假象、煙幕，所有東西都是自己心靈的空虛，沒有真材實料，所以缺乏自信。今日的我，已經不在乎別人所想，也不在乎別人如何去評價，只在乎自己要做回自己。我出入用車，會用最環保慳油的車輛，我早上不會跟別人飛車，但是我會去賽車場練車，我的衣服可說是紅、橙、黃、綠、青、藍、紫都有，鐘意帶白色框眼鏡就白色，有時鐘意黑色就帶黑框；唯獨在出席一些會所或宴會，為尊重別人的身份、場合，而改變衣著的需要。

當一個人有經歷、有自信時，無論裝扮是什麼，行出來自然有氣勢，這根本是出自自己的一個生活態度，沒有人會「白眼」你，因為你心裡就沒有白眼這回事，這便是境(心境)由心生，活得自在。