網上流傳一段影片，星期日凌晨3時在元朗街頭，有個疑似飲醉酒，身穿花恤衫的黑人物，據說叫「元朗上海仔」，走到警方衝鋒車前叫囂，更大力拍打警車車身、車頭，手指指疑似指罵警員。警車上的阿sir、madam並無採取行動，其後更開走衝鋒車。
圖：元朗上海仔「兇」衝鋒車上的警察
未幾，一名更惡的黑衣陀地到場，對元朗上海仔叫罵: 「咩事呀你?.....嘈咩呀…..!」旁邊更出現6、7 名大漢，追著元朗上海仔，他立刻靜晒，旁邊的朋友推著他快步離開。
網民反應嘩然，拍片貼上網者貼文:「12點之後元朗係邊個話事？」
後來傳出，警車上有一名女沙展、一名警員、一名司機，按道理三個人無理由怕幾個黑人物，據稱女沙展當時判斷對方飲醉酒，於是未有理會，叫司機開車走。影片流出，警車上3名阿sir、madam孭大鑊，警隊內部傳聞3人其後遭「照肺」。
「元朗上海仔」在當地也不是背景太強的人物。有前警界中人說，女沙展應是判斷錯誤。正如張家輝在電影「激戰」中說 : 「怯，你就輸了。」在這樣的境況下不可以怯懦。
圖：警察昨晚在元朗大搞反黑行動
警察隨即「做嘢」，昨晚在元朗大搞反黑行動，拘捕9 人，指其涉嫌經營賣淫場所、違反逗留條件、管理賭博場所及非法賭博等。傳出的訊息就是 : 「你班友在元朗玩嘢，就睇差人點對付你。」這種飲醉酒鬧事的行為，可說累街坊了。
Ariel
** 博客文章文責自負,不代表本公司立場 **