政事
淋冰挑戰繼續玩，今趟輪到唐唐，佢一家大細齊齊玩，唐唐淋完冰水再飛落泳池，濕得相當徹底。
唐唐淋完冰水挑機邊個，大家估到啦，當然係死敵 CY ，唐唐話星期日佢都休息，知CY 可能要工作（有點晒命feel），就挑戰CY，話俾個機會佢全家人一齊做件開心好玩的事。唐唐挑機CY製造到話題。唐唐第二個挑戰的人是何俊仁，話係自己主場，特首選戰時兩個人已經慣咗互相挑戰咁話。唐唐唔知係唔係太開心，唔記得講第三個人。
睇唐唐呢次淋冰，經過精心設計，第一話明支持香港肌腱協會，淋完冰水仲要捐1萬元，唔會玩完唔記得主題。第二係話明唔嘥水，在泳池旁邊玩。第三係全家一齊玩夠歡樂，唔似劉夢熊一條友淋完仲要踩爛自己眼鏡咁無助。咁好設計，可能要多得唐唐的公關 Thomas ，佢仲粉墨登場上埋鏡㖭。
Ariel
** 博客文章文責自負,不代表本公司立場 **
阿爺在下周人大常委會擺硬，似成定局，各界都關心佔中派如何反應，方便做好返工上、投資上、生活上的部署。但如果你聽佔中三子之一戴耀廷講嘢，真是「聽完唔知佢想點」。
戴耀廷昨日在報章撰文，以「中央不會因『佔中』退讓」為題，他認為，中央政府可能知道推出的普選特首方案，難以符合泛民要求的國際標準，佔中亦必會出現，現在中央是要把不能實現普選的政治責任推卸給佔中行動。佔中行動正部署抗爭行動，一旦人大常委會下星期公布的政改決定，不符合國際標準，就會一波接一波推出。佔中或能喚起沉默港人的醒覺，爆發出大規模的不合作運動，有可能導致中央政府修正立場。
戴耀廷今日出席一個政改論壇時又話，若人大常委會通過提委會過半數提名的方案，佔中必會發生，建議社會考慮「後佔中」如何進行。
正如長毛過去講過，戴生的想法相當理想化，Ariel都幾同意。佔中都不知幾時搞，而家又過「大規模不合作運動」、「後佔中」，都不知是否同一件事？「佔中」都未搞就講「後佔中」，好心唔好咁超前好唔好？
愈來愈多人覺得有點煩，要打交就早點開打，早打早完，快點有結局。大家靠估，等學聯先在9月中搞罷課，可能現實一點。
