久未露面的前特首董伯伯昨日出場，語重心長呼籲香港人接受人大常委會的政改框架，等香港可以實現普選。話都無咁啱，董伯伯的上一任，即係回歸前最後一任港督彭定康又出嚟講，力促英國政府要幫香港人爭取民主。
董伯伯講完之後，泛民固然都對佢諸多挑剔，有人仲質疑佢係咪照稿讀，講緊阿爺的意思。Ariel去八過，發現咁樣諗就認真捉錯用神。
點解咁講呢？董伯伯雖然貴為政協副主席，屬於國家領導人，但佢今次並非將阿爺的話照稿讀出嚟，而係講咗個「溫和版」！
細心聽吓董伯伯的講話，會發現佢當中有啲說法，好似話「佔中」發起人，不乏愛國和愛護香港，大家都為香港好﹔又稱讚準備罷課的學生，同樣熱愛香港、有理想、有熱情、有年青人純淨和衝動。
呢番話不乏表揚，有啲更算係香港人「啱聽」，董伯伯堅決反對「佔中」，但亦勸大家唔好犯法，接受人大常委的方案，令政改向前行。
呢啲當然唔係照阿爺稿讀啦，如果搵返阿爺啲講稿，不論是基本法委員會主任李飛、人大法工委副主任張榮順，以至中聯辦曉明哥，佢哋的講稿強硬得多。佢哋都話而家方案十分完美，對泛民用語亦好強硬，所以董伯伯已算係就住香港人嚟講。
咁啱董伯伯遇到肥彭開口，總算起到平衡作用。睇返肥彭講嘢，佢真係叻，之前外界對香港有好多說法，有人話香港未來選舉係「北韓式」，呢個比喻唔多適當，因為北韓執政勞動黨書記金正恩，根本唔係選出嚟，只係由議員選出嚟，人民無權選出行政首長。
肥彭的舉例就適切啲啦，佢話呢個係「伊朗式」選舉，平情而論比較貼題，因為伊朗的選舉，都係先經過宗教領袖審核候選人，以防有啲太親西方、不合教義的人出選，比較近似而家人大常委會通過，要提名委員會過半數提名支持，「先篩選、後普選」的方案，所以肥彭真係識嘢。
不過，佢叫英國要盡責任，幫香港促進民主，呢個講法就唔能夠完全抽離歷史去睇啦！阿爺依家就大條道理，話英國管治香港一百四十多年，都無搞過民主，臨尾先話嚟搞，而香港回歸後呢十幾年，搞的民主比過去百多年多，呢點亦非完全無道理。
肥彭講到的伊朗式，更令人想起三、四十年前，英、美國支持的伊朗政權，就係伊朗巴列維王朝，係一個親西方的皇，人民更加無得選，仲衰過而家，但佢立場親西方，所以英、美非常like佢，對伊朗一啲民主都無，完全無反對。查實而家伊朗的政治制度，已比當年有好多進步。
不論點講都好，而家政改去到兩陣對營的狀況，呢邊出董伯伯，呢邊出肥彭，搞到好似打牌咁，睇嚟仲陸續有嚟喎。
Ariel
** 博客文章文責自負,不代表本公司立場 **
