罷課殺到嚟

「大專政改關注組」下星期發起罷課一個禮拜，抗議人大常委的決定。講講吓就快到，各大專院校校長同教職員開始要面對呢個問題，好似啲大學校長一出席公開活動，實俾記者追問點處理學生罷課。

  

大學裡的各類協會和組織亦開始圍繞罷課的議題表達睇法，其中城大教職員協會出咗個內部電郵俾會員，內容都算「出位」啦。

電郵提出三個基本原則，叫教職員要盡量減低罷課對學習活動的影響，不要懲罰參與罷課的學生，最後一點特別啲，叫老師們不論學生有無罷課，都要盡方法便利佢咃學習。

電郵提出九點建議，包括如果學生和平理性表達訴求，教職員處理時要有彈性、要向學生解釋罷課原因，如果課堂要取消，應該盡早通知學生，提供其他學習活動俾佢哋，好似發放閱讀材料或者功課，最後一著係補課，仲哋叫老師們唔好罰學生之餘，喺罷課期間亦唔好計學生出席率，如果老師堅持要上堂，就應該搵人錄低，再放上網等學生有得睇返。

電郵又建議各部門主管，如果教職員響應罷課，就唔要佢哋預先申請放假參與，話教職員一向都係彈性上班時間，再加上已經提供閱讀清單、功課等「其他學習經歷」俾學生，都算有教學活動，唔算放假。

城大教職員協會的建議，都可以話係至今見到最便利罷課的建議啦。

Ariel

** 博客文章文責自負,不代表本公司立場 **

人大常委全票通過特首選舉框架，支持和反對的人士紛紛表態後，政局又好以靜咗少少，不過，其實阿爺已經開始密密會見不同的建制團體，密密出招。

北京開始進入清涼的秋季，但香港的政改熱剛剛開始，呢兩日就有工聯會同新民黨的訪京團。阿爺逐個見建制派政團同商界，外界都關心要傳遞什麼訊息，今日工聯會見完張委員長之後，引述張德江用了「不可撼動」字眼，他們得到的訊息係，激烈的街頭行動，都不能逼使阿爺在人大常委決定後改變主意，大家唔使幻想。

未來最大堆頭的訪京團，當然要數呢個周日全國政協副主席董伯伯率領的工商界訪京團啦，城中超級富豪如李超人等都會隨團，據聞除了主管港澳事務的人大委員長張德江會，最高話事人習大大會親自接見。

據了解，稍後仲會有不同界別人士組團訪京，令Ariel諗起03年大遊行後，阿爺調整對港政策，設立港澳工作協調小組，以更高層次處理港澳事務，之後亦安排本港不同政團訪京，宣示中央對港立場。10年後又再現相類似的安排，睇嚟阿爺都係高度關注香港的局面啦。