馬雲偶像係阿甘

淘寶變走寶，香港財經友，今早一定呻呻呻，阿里巴巴分明想在香港上市，但被港交所拒絕，昨晚終於在美國紐約交易所成功掛牌，上市價＄68美元，第一手買賣開價，已經是＄92.7，急升36﹪，之後一直企穩在＄90以上，收市報＄93.89。

香港股民空嘆走寶，無得怨，唯有睇新聞。Facebook去年上市，開市股價大幅滑落，馬雲前車可鑑，阿里巴巴訂價謹慎唔在講，就連股份配售俾乜人，都揀得好小心，同集團關係密切的公司，優先配售，互惠基金同退休基金都係，確保長期投資持有，專門搞風搞雨的對沖基金就冇運行，有啲基金大額申請200億美金，只分到幾百萬銀股份，死未？

 

在紐約交易所傳統開市敲鐘儀式，馬雲竟然無企出嚟，成個畫面都係唔知乜人，馬雲話呢八個都係公司客戶，使用在淘寶天貓等marketplace賣貨啲小商店主，由佢哋上去敲，代表馬雲經營哲學的核心，客戶第一，僱員第二，股東第三。

咁馬雲忙乜？忙住上美國財經電視台做訪問，CNBC同Bloomberg都見到佢。公司上市成功，老美記者即塲問馬雲，多了一大批新股東，會否改變想法？馬雲話唔會唔會，多謝大家信任，買阿里巴巴股票，但仍然是要客戶第一，客戶開心，公司生意才會做得好。佢仲話，八個客戶代表，五個係女人，係自然揀出來，家陣公司客戶近五成係女人。上市籌集咗＄220億美金，公司突然多咗咁多現金，會點用？馬雲話會用來發展公司的生態系統。

 

馬雲的成功，是美國夢的中國版，問佢誰是他心中的英雄，佢話係阿甘，阿甘在電影裡話人生如一盒朱古力，馬雲話佢每次沮喪，都再睇呢套戲，記住「無論乜嘢變，你仍然是你」。總之非常馬雲，把咀唔停講，但好玄！

小鯊

** 博客文章文責自負,不代表本公司立場 **

肥佬黎變身香港民運領袖後愈來愈高調，出席城市論壇與建制派舌劍唇槍，威到盡，佢同美國鷹派嘅政客、前國防部副部長沃夫維茲在港密會事件亦餘波未了。

南華早報網站截圖

壹仔發言人早前就對南華早報話，黎智英同沃夫維茲係老朋友，兩人去年一齊去過緬甸旅遊，仲得到中國駐緬甸大使館兩次邀請共晉晚餐，所以中方對佢哋兩人的友情，知得好清楚。

吓，又會咁奇怪，肥佬黎喺香港振臂高呼，佢旗下的壹仔唔係叫大家，6.22一齊投票抗共咩? 小鲨一向深信佢係反共鬥士一名，點解突然會話自己同中共的外交人員有交往？香港啲泛民中聯辦都唔入，中方官員都唔見，點解肥佬黎又隨便去見大陸的外交官，佢唔係去投共呀！到底點分析呢單料呢，佢到底係人定係鬼架？

成件事最吊詭的地方係點解中方外交人員會邀請與佢一齊用餐呢？恕小鯊多疑，究竟件事係唔係真架? 阿爺平日鬧肥佬黎咁大聲，如今人地講到咁，阿爺就應該查一查，到底中國駐緬大使館有無人見過肥佬黎，有就低低地認咗佢，無就要出來澄清，以證視聽啦。