上星期日見到iPhone 6炒價大跌，當時有炒作者質疑大炒賣集團聯手壓低iPhone 6回收價，以期牟取巨利，叫大家勿中計賤價沽貨咁話。陸羽仁當時睇到呢個講法，一時間忍唔住，寫了篇短文，叫炒賣iPhone朋友，不要盲信壓價之說，沽貨要快。
事隔幾日，炒賣iPhone 6的狀況急速冷卻 ，最好賣嘅iPhone 6 Plus 128GB初時最高收機價2萬元，減去官價8088元，可以賺到大約1.1萬元。依家嘅回收價已經跌到1.2萬元，賺4000元不到。至於普通的iPhone 6，更可能比官價平300至500元，直情蝕入肉。證實了我當日的講法，這個炒iPhone 6熱潮，火速爆煲。
我覺得整件事，係一個小型泡沫爆破。當中有兩個現象好關鍵，第一，是有大量散戶入市。在網上開售當日，已經聽到好多朋友訂購，一名大學教授朋友說，他有好多學生買iPhone 6，一人買兩部，主要買來炒。我當時已經「打個突」，覺得炒股好盛。由於買貨的人十有九炒，到正式發貨的時候，供應將會非常多。不過，我當時仲覺得學生哥炒iPhone，最多只係原價沽出，應該唔會扮蟹。依家竟然話普通型號的iPhone 6的二手價比官價低300元至500元，學生哥都要蝕入肉，上咗一課。
第二個現象是當時炒友有少少盲目掃貨，不睇市場需要。新iPhone開售，直覺分析只有大型幕iPhone 6 Plus 128GB土豪金，可能比較受內地人歡迎，其他一般型號的iPhone 6細機，不覺得可以大炒。但看炒買iPhone的人湧去訂購，見沒有iPhone 6 Plus，就買iPhone 6，買不到大GB數的機，就買細GB數的，甚有亂炒味道。基於這兩個現象，iPhone 6市場已好有泡沫的特質了。
當日小炒家見到機價跌，就以為有大炒賣集團壓價，我在文章中已經提到，這是散戶的典型心態，見到市場唔就，便以為有人在幕後操控。其實他們不明白，好多時候，特別是短炒的時候，市價就係合理價格，而且要學習接受市場價格。就算真的有集團壓價，你不沽貨，更走不了。更何況iPhone 6這種市場這樣零散，也不是那麼容易操控。
我想借這事件，與大家談談短炒和長揸這兩個概念。短炒一定要順勢，長揸講價值，好多時候要逆勢入貨。買部iPhone想轉手賺錢，當然係短炒而唔係長揸啦。短炒要順勢，意思係見到價升的時候，不妨持有，但見到價格回落，便可能要即刻要掟貨。順勢去炒，成功機會會大一些，逆勢炒作，即係市場開始回的時候，不知斬纜，便好容易變蟹。因此，短炒不需要問理由，順住市場向上湧的時候走一轉，就可以贏到錢，而短炒最容易輸錢的狀況，就是不信市場的走勢，特別係炒緊向上的時候，市場不升反跌，偏偏唔信佢係真跌，攬住唔走，就好容易「瀨嘢」。
什麼是長揸要睇價值，而且好多時候要逆勢呢？之所以長揸，係見到有長線投資的價值，不會是三、五天便沽出，可能會坐一年，甚至三、五年才會沽。既然是睇長線價值，買入的時候一定要平，值100元的東西，最好係60元，甚至40元買得到。因此，你要懂得分析這件東西值多少錢，當中有沒有折讓，折讓大不大。當人人睇淡的時候，你卻看到其價值，買入之後坐其三幾年，便有機會贏大錢。這是與市場當時的短期走勢應該是完全相反的，在2008年買股就是這樣。
市場上人人睇淡，而你卻在低位慢慢地吸貨，待市勢逆轉向上時賺錢。炒iPhone 6，好明顯是短線炒賣，不可作為長線投資。市場出現炒賣價，主要原因係iPhone 6在剛推出時有一個短時期的供求失衡所致，稍後的供應將源源不絕，好難短缺。所以iPhone 6沒可能長線投資，你唔認命長揸，肯定輸錢。iPhone 6只能短炒，就要順勢，也只能夠相信市場價格，不可以堅持己見，覺得這樣、以為那樣。一見價格回落，最好快閃。只能順住個勢，跟市場價格滑浪而行，才有機會成功。
陸羽仁
** 博客文章文責自負,不代表本公司立場 **
