爭取民主，都要繼續注意揾錢。點解咁講？因為今朝開電腦，收到張電郵，外國有個friend寫嚟問，「可唔可以話我知，香港邊啲藍籌股最優質？」
即時心裡有點氣，我哋香港水深火熱，義憤填胸，不叫你雪中送炭，都咪趁火打劫，火中取粟吧！轉頭又冧，他是外國人，你香港爭民主，關佢乜事，佢係個投資者啫，有機會就想揾錢啫。
這個住在加拿大的friend，其實值得講吓。他愛買香港股票，透過恒生同滙豊網，用電腦買賣。大家不知道，加國股票市場，交易成本好高，就算手上股票升，都要扣除大筆駛費，於是變成賺錢不易。唔似香港，交易成本一個percent 唔駛，股票求其升七八個percent，已經有好回報。
兩個月前開始，他開始追問小鯊，幾時佔中？隔幾日就問一次，日子定咗未？問到小鯊煩哂，小鯊鬼知咩，佔中三子都未講。當時，呢個friend好認真咁同小鯊講，佔中一定有事嘅，一定會有亂，股市會跌嘅。踏入九月，他付諸行動，開始減磅，三頭兩日就話，我賣咗港交所，我走咗建設銀行，賣吓賣吓，兩星期前佢話，賣哂啦，家陣全 cash，等入市啦。
今朝看完他的電郵，再看新聞，國際傳媒包括財經傳媒彭博CNBC，頭條全部是佔領香港同雨X革命，大家睇到香港實一實。香港人自覺和平爭民主，老外投資者卻看到有危機，呢個就係分別。但有危就有機，而且機會係公平嘅，去完金鐘旺角，不妨注意吓股票，民主未知係咪爭取到，賺返啲真金白銀都好，幾時入市？要問陸羽仁，但機不可失！
小鯊
** 博客文章文責自負,不代表本公司立場 **
淘寶變走寶，香港財經友，今早一定呻呻呻，阿里巴巴分明想在香港上市，但被港交所拒絕，昨晚終於在美國紐約交易所成功掛牌，上市價＄68美元，第一手買賣開價，已經是＄92.7，急升36﹪，之後一直企穩在＄90以上，收市報＄93.89。
香港股民空嘆走寶，無得怨，唯有睇新聞。Facebook去年上市，開市股價大幅滑落，馬雲前車可鑑，阿里巴巴訂價謹慎唔在講，就連股份配售俾乜人，都揀得好小心，同集團關係密切的公司，優先配售，互惠基金同退休基金都係，確保長期投資持有，專門搞風搞雨的對沖基金就冇運行，有啲基金大額申請200億美金，只分到幾百萬銀股份，死未？
在紐約交易所傳統開市敲鐘儀式，馬雲竟然無企出嚟，成個畫面都係唔知乜人，馬雲話呢八個都係公司客戶，使用在淘寶天貓等marketplace賣貨啲小商店主，由佢哋上去敲，代表馬雲經營哲學的核心，客戶第一，僱員第二，股東第三。
咁馬雲忙乜？忙住上美國財經電視台做訪問，CNBC同Bloomberg都見到佢。公司上市成功，老美記者即塲問馬雲，多了一大批新股東，會否改變想法？馬雲話唔會唔會，多謝大家信任，買阿里巴巴股票，但仍然是要客戶第一，客戶開心，公司生意才會做得好。佢仲話，八個客戶代表，五個係女人，係自然揀出來，家陣公司客戶近五成係女人。上市籌集咗＄220億美金，公司突然多咗咁多現金，會點用？馬雲話會用來發展公司的生態系統。
馬雲的成功，是美國夢的中國版，問佢誰是他心中的英雄，佢話係阿甘，阿甘在電影裡話人生如一盒朱古力，馬雲話佢每次沮喪，都再睇呢套戲，記住「無論乜嘢變，你仍然是你」。總之非常馬雲，把咀唔停講，但好玄！
