今朝政總四千人唔返到工，無端端放一日假，照計可以蛇王，打工仔應該開心先係，鬼知未夠九點，手機已經收爆，兩個政總加一個北角打工仔的SMS，火氣大到呢？抄幾句俾大家睇睇。
「無啦啦返唔到工，又唔俾警方補給資源。佢哋唔係暴民係乜嘢？什麽是和平抗爭？咁都算？真係認為警方點都唔拉人？載耀庭又出現了，拉佢先啦！」
「佢哋再覇埋龍和路東行，就所有港島主要東西通道都block 哂，好危險，睇唔到警方點可以唔理….。一個癱瘓政府總部運作的運動，不是動亂是什麽？」
小鯊唯有好言相勸，「你哋可以連放五日假，仲想點？咪勞氣，中午無嘢做，可以請我食飯。」
點知佢哋一齊話，「仲要做呀，點可以唔做，政府面對危機，人人自動home office做呀！但做得難過返政總辦公室好多呀！」
北角返工個friend 加入發火，「今朝行龍和道塞到死，唔敢行山路，唔識行。下午仲要去中環開lunch meeting ，三點再見客開會，文件好多，無法坐地鐵，一定要揸車，煩死啦。告士打道已經無咗，唔該放返條龍和道俾返大家行，唔該啦！」
今次佔中，其實港島區影响最大。港島中北部癱瘓，中西區冇得返學，銅鑼灣商鋪冇生意，上百條巴士路線要改路。每次立法會選舉，港島支持泛民比率最高，今次港島中產受影响咁大，如果持續下去，後果會點？
小鯊
** 博客文章文責自負,不代表本公司立場 **
爭取民主，都要繼續注意揾錢。點解咁講？因為今朝開電腦，收到張電郵，外國有個friend寫嚟問，「可唔可以話我知，香港邊啲藍籌股最優質？」
即時心裡有點氣，我哋香港水深火熱，義憤填胸，不叫你雪中送炭，都咪趁火打劫，火中取粟吧！轉頭又冧，他是外國人，你香港爭民主，關佢乜事，佢係個投資者啫，有機會就想揾錢啫。
這個住在加拿大的friend，其實值得講吓。他愛買香港股票，透過恒生同滙豊網，用電腦買賣。大家不知道，加國股票市場，交易成本好高，就算手上股票升，都要扣除大筆駛費，於是變成賺錢不易。唔似香港，交易成本一個percent 唔駛，股票求其升七八個percent，已經有好回報。
兩個月前開始，他開始追問小鯊，幾時佔中？隔幾日就問一次，日子定咗未？問到小鯊煩哂，小鯊鬼知咩，佔中三子都未講。當時，呢個friend好認真咁同小鯊講，佔中一定有事嘅，一定會有亂，股市會跌嘅。踏入九月，他付諸行動，開始減磅，三頭兩日就話，我賣咗港交所，我走咗建設銀行，賣吓賣吓，兩星期前佢話，賣哂啦，家陣全 cash，等入市啦。
今朝看完他的電郵，再看新聞，國際傳媒包括財經傳媒彭博CNBC，頭條全部是佔領香港同雨X革命，大家睇到香港實一實。香港人自覺和平爭民主，老外投資者卻看到有危機，呢個就係分別。但有危就有機，而且機會係公平嘅，去完金鐘旺角，不妨注意吓股票，民主未知係咪爭取到，賺返啲真金白銀都好，幾時入市？要問陸羽仁，但機不可失！
