有人沽期指賺大錢？

從佔中運動開始至今，股市日日跌，若從9月的高位開始計，股市已跌2700點，看到跌市沽空期指的人，真係肥仔水啦。

有位股票公司高層話俾Ariel聽，9月的期指情況值得關注，期指去到月底就會自動結算，即係話持有去到月底就計數，沽咗唔使買番都自動平倉，佢話9月期指去到月底結算前，未平倉合約有4萬張，一般情況只有1萬3千張啫。即係話去到9月底時，比平時多了2萬7千張期指合約。

朋友就質疑，係咪有人事先知道佔中會爆大鑊，甚至自己去搞大佢，沽空定啲期指賺大錢呢？Ariel就問，如果係咁搞，係咪可以叫證監會去查一查，有冇人操控市場呢？朋友就話唔容易查，因為有心人，開間BVI公司(離岸公司)，將啲錢投資到對沖基金中，然後叫對沖基金去沽，證監會查來查去都只係查到對沖基金，查唔出所而言，對沖基金沽空期指，好正常啫。

近日網上流傳有個支持佔中的大孖沙，沽空咗2000張期指，獲利超過10億，Ariel計一計數，每張賺2000點，獲利應該只係2億啫。不過，佔中呢家嘢，幕後有人策劃發動，真係去沽吓期指，執吓水，認真唔出奇，但要查估計就唔係咁容易啦。

Ariel

** 博客文章文責自負,不代表本公司立場 **

佔中示威者包圍政府總部，目標係令到特首明天早上唔可坐車入政總返工，逼佢同示威者對話。

政府總部裏邊有3000個公務員返工，示威者包圍政總，客觀上令到汽車駛唔到入政府總部，高級官員坐車上班，所以第一個影響係令高級官員唔可以返工。

其他公務員步行返工，照計佔中嘅示威者唔會阻擋普通人歩行入政府總部。不過公務員返工時，會唔會同示威者發生衝突，就不得而知啦。 固然3司、局長、常秘佢地個樣比較容易認，即是行路返工，都好容易被示威者認出，弄不好拉住佢要對話，甚至嘈起嚟，所以高官都好難步行返工啦。

聞說政府都有應急方案，有後備地方，俾高官去返工。