政事
泛民上周「突襲」建制派，在上星期六中午截止報名前，全體加入財委會轄下的工務小組委員會及人事編制小組委員會，誓要奪取兩小組委員會主席位置。呢兩個小組委會員都係喺財務委員會前，預審批政府撥款申請，主席位置都可以話極為重要。
兩個小組主席位置失陷，俾泛民搶佔後，日後唔會阻泛民議員拉布，政府向兩個小組申請撥款呢第一關都好難過，唔好話過財委會的第二關啦。
有立法會中人話，如今唯有諗點樣補救，日後政府有重大撥款申請時，可能改變策略，唔將撥款申請攞上去工務及人事小組兩個委員會，直接上財委會，避開第一關。
佢話以往都試過，即使係工務同人事編制小組被否決的議題，亦都可以再財委會，所以日後大將撥款申請直接上財委會討論通過。
不過，救得一樣唔等於救到第二樣，即使財委會由建制派主導，但日後有大型撥款時，都有可能好似新界東北撥款咁，打生打死，到時會內會外都有抗爭運動，政府諗起都頭痕啦。
Ariel
** 博客文章文責自負,不代表本公司立場 **
佔中搞咗個幾星期，幾個據點仲未有撤離動靜，原來唔只金鐘、旺角，就連立法會大樓，一樣被「佔領」咗。
立法會原定聽日復會，但主席曾鈺成話衡量過形勢，決定押後到下星期三先復會，又話收到有議員投訴，話有市民走入立法會大樓瞓覺同用洗手間。曾主席話議員有權帶訪客入大樓，秘書處唔會干預，但會勸吓議員了解使用立法會場地守則。
圖片來源︰亞洲華爾街日報
立法會被「進佔」的狀況，外媒都一清二楚，美國《亞洲華爾街日報》有篇報道，圖文並茂介紹情況，話原來學聯同學民思潮已進佔立法會大樓八樓同九樓，嗰度係班泛民議員義務借出嚟，學聯同佔中主力喺九樓，學民就喺八樓打躉。
報道有張相，話在一位議員的寫字樓內，入面堆滿晒大聲公，仲有一箱箱示威用的物資，報道話當大批市民喺街上聚集時，呢班學生哥就忙於喺大樓入面開會、上網facebook、商討對策，會議室內堆滿佢哋嘅背包，報道仲話好多人都已經除晒鞋添！
有啲學生傾到攰，就索性喺房入面瞓，見有人喺房瞓咗，仲會幫手熄燈夜，至於夜嘛嘛肚仔餓，學生哥就會「叮」飯食，報道話啲學生在走廊食飯，仲偶爾會同保安哥哥嘈起上嚟！難怪，因為學生哥始終都無有效證件人士嘛！
咁睇立法會真係成為佔中基地喎。
