俊和高層曾與佔中者對話

上市公司俊和發展集團，因不滿大學生和學者參與佔領行動，終止贊助多間大學的獎學金。

 

俊和基金自 2007 年開始，贊助港大獎學金，俾建築和工程學系學生，金額是每年 10,000元。港大話收到來自學生、校友、捐贈者及社會人士的信，反映咗大眾對近日事態的不同看法。

 

理大就話有機構撤銷早前承諾的捐贈，但不會單方面公開個別捐贈機構的協議。曾經獲得俊和捐助的科技大學話，捐助獎學金要視乎捐助人的意願。大學尊重捐助人的決定，不會評論與捐助人的關係。

 

俊和呢個決定自然引起學生代表批評，港大學生會話佢哋終止獎學金的贊助，是影響院校自主及學術自由，係政治打壓。

 

一般生意人俾人感覺都係遠離政治表態，俊和今次都走得好前喎，網上就傳緊一段聲帶，顯示9月30日俊和集團副主席彭一邦，去到銅鑼灣與佔領者對話。

 

佢話自己支持學生的理念，但就質疑爭取是否要影響其他人的生活，希望佔領者反思，呢個係咪香港人的核心價值觀？成條聲帶兩分幾鐘，期間有人罵佢講的係「歪理」，佢話好傷心，見到香港人因為今此事件而分裂。

  

暫時未搵到彭求證聲帶，但呢個講話都一定程度反映咗受影響市民的想法。

Ariel

** 博客文章文責自負,不代表本公司立場 **

多事之秋，成日話缺水的亞記亦都成為新聞，十月份的糧到依家都未出到，真係難為前線員工啦。昨日高層去到新聞部探班，對遲出糧鞠躬致歉，又話公司正同潛在股東洽談出售股權中，希望下周初有消息。

 

最有趣就係發言人話，潛在股東是一名知名人士，個名沒有「木」字部首，唔通玩「你懂的」。

 

成日傳出財困咁多年，亞視員工當然希望有個有實力的水喉，不過，呢個時候換老板，都未知係咪幫到續牌，兩間免費電視台的牌照明年11月屆滿，通訊局在八月已開會討論過亞視續牌的事，在11月底前會就是否續牌交建議俾行會考慮，行會作出決定後，政府就會向公眾交代。

 

亞視咁搞，股權唔變，唔易俾佢續牌。若然係有財力的新賭王入主，都有新希望。