政事
多事之秋，成日話缺水的亞記亦都成為新聞，十月份的糧到依家都未出到，真係難為前線員工啦。昨日高層去到新聞部探班，對遲出糧鞠躬致歉，又話公司正同潛在股東洽談出售股權中，希望下周初有消息。
最有趣就係發言人話，潛在股東是一名知名人士，個名沒有「木」字部首，唔通玩「你懂的」。
成日傳出財困咁多年，亞視員工當然希望有個有實力的水喉，不過，呢個時候換老板，都未知係咪幫到續牌，兩間免費電視台的牌照明年11月屆滿，通訊局在八月已開會討論過亞視續牌的事，在11月底前會就是否續牌交建議俾行會考慮，行會作出決定後，政府就會向公眾交代。
亞視咁搞，股權唔變，唔易俾佢續牌。若然係有財力的新賭王入主，都有新希望。
Ariel
** 博客文章文責自負,不代表本公司立場 **
澳洲媒體Fairfax Media爆出梁振英收受巨額酬勞。有份調查的記者John
Garnaut接受「美國之音」訪問時透露，有關消息是「匿名舉報」。佢話上周日收到匿名人士提供份合約，他不願猜測是哪一方泄露呢啲資料。
佢話獲得匿名舉報資料係上周日，即係佔中踏入第八日，呢個日子Ariel好有印象，呢日可以話係佔中以來最兇險的一日，政府提出必須在第二日打通政總返工的通道，全國政協副主席董建華同終審法院前首席法官李國能等有份量的人士，發聲明公開呼籲示威者撤離。
Ariel認識的一位政壇高人在那天亦通過氣，話情勢有啲危，若不改善要清場。不過最後出現咗死線前的轉機，Ariel都有寫文同大家分享過。
呢位老外記者在訪問中形容，連續多日出現前所未有的公民抗命行動，令香港道路癱瘓，要求梁振英下台，「任何損害梁振英的資料，都極具新聞價值，我不會與你爭拗這事」，開始向有關方面查證。
俾料的匿名者可以成份合約俾到記者手，都真係幾有料到，都應該係有心掟炸彈啦，就好似選舉時掟手榴彈炸人的目的，配合到示威者的訴求，而選擇澳洲媒體亦都有相當的手法，一是間公司在澳洲上市，二亦都有在外面爆番嚟香港的效果。
