硬要逼出流血？

路透社昨日爆出中央最高層對佔中的態度，知情人士話有啲料到。

路透社話，國家主席習近平月初主持國家安全委員會會議，提到特區政府與示威者對話，已是讓步，強調普選涉及主權問題，中央不會繼2003年23條立法及2012年國民教育事件後，再作第三次讓步，否則先例一開，抗爭活動可能蔓延到內地，引起骨牌反應，西藏、新疆以及其他省區都可能相繼要求選舉權利。

報道又話，中央認為若佔領持續，受損害的是香港，不是內地。中央政府支持特區政府依法施政，亦支持警方執法。除非事態嚴重失控，例如出現殺人、縱火、搶掠等，否則不會出動駐港解放軍。

Ariel四圍八咗吓，熟悉北京政壇高人話都收到風，阿爺定咗調，希望在唔流血的情況下清場，唔會輕言出動解放軍。本來本地局面亦開始趨向平靜，點知前晚出現咗一班人落佔領區搭竹棚，迅速到無人有，到昨日上午警方清完金鐘道，晚上又有人調兵去圍龍和道，非常之有組織。

高人好奇怪，唔通有啲人知道阿爺立場想唔流血，就將行動升級，同差人硬踫，力求逼到擦槍走火，你唔想流血都逼到你流血。

之前都唔少人強調香港唔係搞顏色革命，唔係要推翻政權，但有啲有心人咁樣搞落去，事態好易失控，硬要逼出流血。到時影到一張解放軍操入中環的相，上晒國際媒體頭條，會唔會係搞局者的目標呢？

Ariel

** 博客文章文責自負,不代表本公司立場 **

蘋果日報將軍澳廠房晚晚被示威者包圍，昨日成功突破封鎖，今早出紙情況好好多，大體上正常去到報攤。

蘋果前日向法庭申請臨時禁制令止唔到咳，照樣被示威者封路，出紙遲了四、五個鐘。昨天變陣，實行大幅提早到晚上8點就截稿，提早印刷，提早出車。由於副刊等版面更是一早印好，所以昨晚發行商德強記早到晚上7點已開始在蘋果廠房拉紙走，其餘大部份的紙，包括頭疊，大部份在示威人士開工前已拉走。

示威者在10點開始到場，到午夜人數最多，但昨晚示威人士到場時大量蘋果報紙已送走。蘋果有事前通知警方，要求協助開路，後來有警察協助開路，讓貨車送走餘下的少量報紙離開印刷廠。全部的蘋果報紙，約在凌晨一點左右離廠，所以能保持正常發行。

即使是蘋果中人都十分擔心，昨日提早截稿提早印，一早送晒出街，殺示威者一個措手不及，但若然今晚示威者提早到8、9點開工攔截，又係一場混亂。

Ariel覺得阻報紙運出街不應當，但如今這種亂世，乜事都可以發生。