無記硬撐花哥

無記新聞部的消息一浪接一浪，新聞阿頭花哥袁志偉同經理Ming姐黃淑明，為日前處理清場新聞手法解畫的聲帶上午流出，下午在社交網站就再漏出一封由集團總經理李寶安向所有員工發出的內部電郵。

 

20141017_LETTER OF MARK LI01

電郵中，李寶安語氣相當強硬，指責偷錄聲帶係卑鄙同懦弱的行為，話公司對呢件事感到震驚，又話內部可以有不同意見，但應以理服人，唔係偷錄講話後斷章取義式放上網，認為做法超越咗新聞工作的專業底線，破壞管理層對同事的信任。又強調要防止類似事件發生，公司會嚴正處理，追究到底咁話。

原來無記企硬的信唔止一封，較早前，李寶安亦向員工發出另一封信，將回覆「香港本土傳媒關注組」成員毛孟靜和范國威的信件，轉發俾員工睇，話對佢哋的指責，要以正視聽。

 

20141017_LETTER OF MARK LI02

李寶安呢封回信語氣亦好硬，除咗回應有關抽新聞用語的批評，仲話公司尊重及支持新聞部主管的專業及判斷，唔接受內在或外來的施壓，更點名蘋果日報等壹傳媒旗下的部份媒體，話唔容許其他人士「指指點點」，企圖干涉無記的新聞部編輯自主。

無綫中人證實兩封信都確係公司發出，俾所有同事，Ariel就覺得既然封信俾咁多員工，應該都預咗流出去，睇嚟雖然未必有心放料，但無記高層都應該唔介意俾外邊人知道佢哋點睇。從李寶安的通告推論，無記硬撐花哥啦。

Ariel

** 博客文章文責自負,不代表本公司立場 **

《明報》管理層公布總編輯張健波昨日退休，早前由大馬空降出任首席執行總編輯的鍾天祥出任「代總編輯」。呢個任命自然激起明報職工協會不滿，話對管理層拒簽新聞約章及今次調動，強烈不滿及遺憾。

有人話TVB風波同早前的《明報》事件有啲類似，但Ariel覺得性質並不相同，《明報》事件是由換人而起，公司管理層想將總編輯劉進圖換走引發風波。但TVB事件就直接由新聞處理觸發，即使內藏新聞部的人事角力，都只是潛而不露。

 

《明報》當日鬧出風波後搵半退休的前總編張波頂住檔，做住總編輯先，張波經驗老到，身體狀況good fit(其鋼條身裁比20歲的後生仔更佳)，行家見到佢，都話佢會一直做落去。但張波半年前已坦言，做到10月會走，結果真是如此。

不過講番鍾天祥，而家矛指向佢，有少少無辜，據接近鍾生的人講，鍾生來香港，皆因早前明報的編務董事翁昌文患上重症萌退意，《明報》老闆就想搵鍾天祥來港，取代翁昌文，做明報編務董事，同時調海外版阿頭呂家明回港，接替劉進圖做總編輯。但香港《明報》中人不太喜歡海外版的呂家明，就反建議不如叫鍾天祥先做總編輯，熟習一下香港環境，稍後才做編務董事更佳。管理層接受建議，怎料事情成真後，卻演變成一個反對大馬人空降香港做老總的事件。

如今雖然員工反對，《明報》管理層似乎都繼續原有安排，逐步找鍾天祥接替老總位置。