《明報》張波退任 鍾天祥任「代總編」

《明報》管理層公布總編輯張健波昨日退休，早前由大馬空降出任首席執行總編輯的鍾天祥出任「代總編輯」。呢個任命自然激起明報職工協會不滿，話對管理層拒簽新聞約章及今次調動，強烈不滿及遺憾。

有人話TVB風波同早前的《明報》事件有啲類似，但Ariel覺得性質並不相同，《明報》事件是由換人而起，公司管理層想將總編輯劉進圖換走引發風波。但TVB事件就直接由新聞處理觸發，即使內藏新聞部的人事角力，都只是潛而不露。

 

《明報》當日鬧出風波後搵半退休的前總編張波頂住檔，做住總編輯先，張波經驗老到，身體狀況good fit(其鋼條身裁比20歲的後生仔更佳)，行家見到佢，都話佢會一直做落去。但張波半年前已坦言，做到10月會走，結果真是如此。

不過講番鍾天祥，而家矛指向佢，有少少無辜，據接近鍾生的人講，鍾生來香港，皆因早前明報的編務董事翁昌文患上重症萌退意，《明報》老闆就想搵鍾天祥來港，取代翁昌文，做明報編務董事，同時調海外版阿頭呂家明回港，接替劉進圖做總編輯。但香港《明報》中人不太喜歡海外版的呂家明，就反建議不如叫鍾天祥先做總編輯，熟習一下香港環境，稍後才做編務董事更佳。管理層接受建議，怎料事情成真後，卻演變成一個反對大馬人空降香港做老總的事件。

如今雖然員工反對，《明報》管理層似乎都繼續原有安排，逐步找鍾天祥接替老總位置。

Ariel

** 博客文章文責自負,不代表本公司立場 **

路透社昨日爆出中央最高層對佔中的態度，知情人士話有啲料到。

路透社話，國家主席習近平月初主持國家安全委員會會議，提到特區政府與示威者對話，已是讓步，強調普選涉及主權問題，中央不會繼2003年23條立法及2012年國民教育事件後，再作第三次讓步，否則先例一開，抗爭活動可能蔓延到內地，引起骨牌反應，西藏、新疆以及其他省區都可能相繼要求選舉權利。

報道又話，中央認為若佔領持續，受損害的是香港，不是內地。中央政府支持特區政府依法施政，亦支持警方執法。除非事態嚴重失控，例如出現殺人、縱火、搶掠等，否則不會出動駐港解放軍。

Ariel四圍八咗吓，熟悉北京政壇高人話都收到風，阿爺定咗調，希望在唔流血的情況下清場，唔會輕言出動解放軍。本來本地局面亦開始趨向平靜，點知前晚出現咗一班人落佔領區搭竹棚，迅速到無人有，到昨日上午警方清完金鐘道，晚上又有人調兵去圍龍和道，非常之有組織。

高人好奇怪，唔通有啲人知道阿爺立場想唔流血，就將行動升級，同差人硬踫，力求逼到擦槍走火，你唔想流血都逼到你流血。

之前都唔少人強調香港唔係搞顏色革命，唔係要推翻政權，但有啲有心人咁樣搞落去，事態好易失控，硬要逼出流血。到時影到一張解放軍操入中環的相，上晒國際媒體頭條，會唔會係搞局者的目標呢？