政事
前日係佔中運動的啟動一個月，或者係外國傳媒眼中的「雨傘革命」的開始，網上流傳一段影片，有大學生前日喺又一城商場裡面，擔起黃色遮，響應紀念活動。
短片所見至少有一男一女學生參與活動，片段應該係由女學生所拍，當佢哋擔遮後，有保安上前勸止佢哋的行動，學生質疑點解唔可以在商場內擔遮，保安就叫佢哋想玩去商場外面，商場要做生意，又話收到客人投訴在商場開遮可能撞到人，請佢哋離開。
其中一名保有點勞氣咁話：「你讀咩書，麻煩你離開啦。」拍攝緊的女學生即刻反問：「請問你果句『讀咩書』係針對乜嘢呀？」最後，保安員求佢哋離開「你哋讀咁多書，我無讀書，麻煩你哋離開。」
條片引起討論，在社交媒體廣泛傳播，Ariel的朋友中分成兩派，有人覺得行商場又冇明文規定，點解唔可以有擔遮的自由呢？亦有朋友覺得保安員幾慘，俾啲後生仔女玩咁，學生示威時應該考慮埋對別人的影響。
一條片，又引起不同看法人士的爭論，亦都突顯咗依家社會兩種思維模式同理念，真係愈走愈遠。
Ariel
** 博客文章文責自負,不代表本公司立場 **
自由黨田北俊公開呼籲特首梁振英考慮辭職後被全國政協「搣柴」，外界都好關心田少以至少部份成日窒特首的政協，有何反應。
田少決定辭去自由黨黨魁一職，話日後可更加「暢所欲言」，但其後見記者時，評論都唔算激，至多玩吓「句句有骨」，例如記者問佢2017年會否選特首﹖佢就話「行政長官呢份工認真唔係好做，持份者包括體育界、宗教界、收入$14,000樓下，富豪呀，北京呀，都係你嘅老闆，我可能做慣老闆，叫我做夥計服侍咁多老闆呢，我冇咁嘅能力，亦都冇咁嘅興趣囉。」
田少講的領域大部係特首CY近期講錯說話的地方，可見田大少度氣都相當頂住。不過以他的脾性，一係唔講，咁講已算溫和，可能是顧慮黨友的處境，自己唔玩，都唔想累到仲要同阿爺玩的黨友。
其餘平日比較出位批特首的政協，如立法會曾主席、立法會議員林大輝和工聯會嫻姐，部份都有現身。例如曾鈺成昨日早上在有線電視訪問時和特首大唱反調，稱個人看不到有外部勢力介入這場運動，「我睇唔到有事實呀。可能特首佢睇到，我睇唔到嘛；佢睇到好多嘢，我睇唔到㗎」。不過就唔知個訪問在田少摵柴事件發生前定發生後做。假設設問在摵柴事件發生後做，都可以話曾主席只係講不同意見，唔係倒梁。
林大輝就激少少，昨日在立法會大會討論成立創新及科技局時，直接話CY說話充滿語言偽術「好叻」，批評其「14K論」及「體育界宗教界對經濟無貢獻論」令人摸不著頭惱，慨嘆「講唔啱聽嘅說話要付出代價」，又話「苦口良藥利於病，忠言逆耳利於行」呢啲說法在香港政界行不通。句句都似乎在間接評論搣柴事件。立法會曾主席即時問大輝哥：「你係咪政協委員？」呢個問題唔知算唔算提醒，但大輝哥對曾主席的問題無回應。之前有傳田少搵過大輝哥入去自由黨接自己黨魁個位嚟做，兩人應該有計傾，大輝哥似乎都幾唔順田少被搣柴。另外暫時未見嫻姐發聲。
由田少到大輝，他們的言語都是對搣柴事件的反彈，反彈過後，冷靜過來，建制派應會重新評估北京領導的新作風，以及自己在這種施政新風下，應該如何自處了。
