政事
佔中三子被爆往來電郵，其中戴耀廷中彈最多，捲入多筆給港大的神秘捐款，到依家捐款者仍是謎，只係承認是「本地巿民」捐給另一佔中發起人朱耀明，朱耀明期望捐款用作教育，強調跟足大學程序處理捐款。
佔中三子在籌備運動期間，為咗保持中立同超越黨派的感覺，與本地政黨保持一定距離，盡量不與本地泛民政團有過多關係，希望予人係獨立學者和民主運動追求，避免被政治化。好似被爆的電郵中，陳健民收到來自《南華早報》及「半島電台」邀請，回應六四紀念館問題，但陳健民表明，佔中不會回應相關問題，相信是要跟六四保持距離。
今日有人在討論區爆料，話原來戴耀廷係民主黨創黨會員，屬九龍西支部，其實作為一個對本港民主有追求的人士，早年加入過民主黨不出奇，只係戴耀廷又好似真係冇特別交代過，自己是民主黨創黨會員身份。
Ariel問民主黨，有份創黨的李永達話唔知，要查翻當年名單。主席卿姐話自己黨齡淺，要問番創黨會員。前主席何俊仁就話不會公開黨員身份，等戴耀廷自己答。民主黨無人肯答，帶人遊花園，搞到Ariel有啲暈啦。戴耀廷就未覆。
Ariel
** 博客文章文責自負,不代表本公司立場 **
Ariel 老友今晚去啟德的「香港美酒佳餚節」，只見人頭湧湧，人多到不得了，仲被佢遇埋政務司司長林鄭月娥，林鄭話以市民身份去，到處參觀。
佔中拖咗咁耐，無論佔中或者反佔中，都想抖抖氣，我估林鄭都唔例外，借住出席呢類輕鬆活動，暫時放下政改問題。
林鄭參觀「香港美酒佳餚節」。
美酒佳餚節今年已經是第六屆舉辦，但由於佔領行動關係，首次移師到前啟德機場跑道上舉行，因為交通不便，部分參展商退出，令參展商數目只有270個，較去年減少了一成。旅遊發展局知道去啟德機場跑道較為不方便，故今年特別提供免費穿梭巴士去會場。
朋友話未到放工時候，阿伯師奶很多，到放工時間後，白領西裝友多咗。五、六點時，大舞台播歌，播梅艷芳、譚詠麟的金曲，好有懷舊感，好多人當嘉年華會都玩，雖然只有歌聽無表演。朋友話愛酒者去，不枉此行，因為酒是主角。但如果唔飲酒，就無咁享受，食物亦不便宜，芝士小食三、四十蚊都要起碼。
今屆美酒佳餚節移師前啟德機場跑道舉行。
昨日入場人數已升7成，除咗話佔中低氣壓，好多人想出來飲食抖吓氣外，就係因為啲市民諗住免費入場，加免費接駁車，所以大堆人湧來。呢個香港美酒佳餚節，都可以話因為佔中因禍得福了。
