政事
泛民、佔中、學聯、學民思潮及公民團體組成的五方平台，繼續傾泛民立法會議員辭職公投可行性的可能性，暫時是學聯及學民思潮支持辭職公投，泛民有分歧，開始多人提反對意見。反對者主要係怕輸掉議席的風險，令整個運動自找失敗。
亦有泛民擔心若五區辭職，補選之前少了幾個泛民議員，建制派會偷步提法案，公民黨梁家傑話，泛民目前直選議員比多建制派兩人，所以在分組點票中可以否決建制派動議，若少了五名泛民議員，泛民在分組點票即時失掉否決權。過去比較支持辭職公投的民主黨，就未見再表態。
泛民有保留，政府亦唔接受。政務司司長林鄭月娥話，留意到近日有人提出不同方案，但她認為很多方案都不切實際，在香港的選舉及政治制度中，並沒有所謂公投安排，任何打著公投名號進行的活動，都沒有法律約束力。她又話，假如議員打算辭職引發選舉，就要想清楚，因為隨時涉及過億元公帑。
兩方面都唔接受，辭職公投唔易搞得成。可能因為咁，佔中發起人戴耀廷又提另一方案，建議立法會否決政改方案後，特首解散立法會，全部一齊補選。呢個建議騎呢之處在於要特首CY 去做，你話CY會唔會聽戴耀廷枝笛?
Ariel
** 博客文章文責自負,不代表本公司立場 **
泛民醞釀搞辭職補選引發「變相公投」，2012年無參與五區補選的民主黨，今次卻成為主力推手之一，民主黨主席劉慧卿話，大家都認為值得討論，民主黨樂意商討。佢話首先要候選人自己願意，而何俊仁在很多場合都說過自己樂意。
現時泛民傾緊辭職公投有兩個做法，第一個做法是搵一個來自超級區議會議席的泛民辭職，咁一個人辭職已可觸發全港性投票，因為超級區議會議席無劃區，本來已是全港一齊投。第二個做法是在五個直選選區各找一個泛民議員辭職，五區一齊補選。由於政府已改例，辭職議員同一屆不能補選，所以辭職者要退場，由其他人去選。所以只辭一個超級區議會議席簡單啲，而且最多只輸一個位，不似五區一齊辭，萬一五個位都輸晒，政府攞多五票有機會通過政改方案。
劉慧卿就說，無論只有身為超級區議員的何俊仁辭職，抑或五個區的直選議員辭職，相信大家都願意去承擔。
講起何俊仁，他是積極推動變相公投的一份子，聞說他建議由學聯周永康出戰參選。睇嚟佢都好睇得起周永康，而周都有啲心動。
不過仁哥捧周永康參選的建議，在民主黨內引起極大反彈。有民主黨內二線人物話，自己捱咗十幾廿年，都等唔到有機會選立法會，而家啲大佬話唔做，竟然捧學聯的人去做，真係唔知入黨為乜？ 睇嚟仁哥捧周永康的大計，都唔係咁無風無浪。
