何俊仁支持周永康參選

泛民醞釀搞辭職補選引發「變相公投」，2012年無參與五區補選的民主黨，今次卻成為主力推手之一，民主黨主席劉慧卿話，大家都認為值得討論，民主黨樂意商討。佢話首先要候選人自己願意，而何俊仁在很多場合都說過自己樂意。

現時泛民傾緊辭職公投有兩個做法，第一個做法是搵一個來自超級區議會議席的泛民辭職，咁一個人辭職已可觸發全港性投票，因為超級區議會議席無劃區，本來已是全港一齊投。第二個做法是在五個直選選區各找一個泛民議員辭職，五區一齊補選。由於政府已改例，辭職議員同一屆不能補選，所以辭職者要退場，由其他人去選。所以只辭一個超級區議會議席簡單啲，而且最多只輸一個位，不似五區一齊辭，萬一五個位都輸晒，政府攞多五票有機會通過政改方案。

劉慧卿就說，無論只有身為超級區議員的何俊仁辭職，抑或五個區的直選議員辭職，相信大家都願意去承擔。

講起何俊仁，他是積極推動變相公投的一份子，聞說他建議由學聯周永康出戰參選。睇嚟佢都好睇得起周永康，而周都有啲心動。

不過仁哥捧周永康參選的建議，在民主黨內引起極大反彈。有民主黨內二線人物話，自己捱咗十幾廿年，都等唔到有機會選立法會，而家啲大佬話唔做，竟然捧學聯的人去做，真係唔知入黨為乜？ 睇嚟仁哥捧周永康的大計，都唔係咁無風無浪。

Ariel

** 博客文章文責自負,不代表本公司立場 **

佔中三子被爆往來電郵，其中戴耀廷中彈最多，捲入多筆給港大的神秘捐款，到依家捐款者仍是謎，只係承認是「本地巿民」捐給另一佔中發起人朱耀明，朱耀明期望捐款用作教育，強調跟足大學程序處理捐款。

佔中三子在籌備運動期間，為咗保持中立同超越黨派的感覺，與本地政黨保持一定距離，盡量不與本地泛民政團有過多關係，希望予人係獨立學者和民主運動追求，避免被政治化。好似被爆的電郵中，陳健民收到來自《南華早報》及「半島電台」邀請，回應六四紀念館問題，但陳健民表明，佔中不會回應相關問題，相信是要跟六四保持距離。

今日有人在討論區爆料，話原來戴耀廷係民主黨創黨會員，屬九龍西支部，其實作為一個對本港民主有追求的人士，早年加入過民主黨不出奇，只係戴耀廷又好似真係冇特別交代過，自己是民主黨創黨會員身份。

Ariel問民主黨，有份創黨的李永達話唔知，要查翻當年名單。主席卿姐話自己黨齡淺，要問番創黨會員。前主席何俊仁就話不會公開黨員身份，等戴耀廷自己答。民主黨無人肯答，帶人遊花園，搞到Ariel有啲暈啦。戴耀廷就未覆。