公投死因探秘

泛民五方平台傾辭職公投，由開始熱鬧起哄，到而家分歧曝露，外界睇到眼花，特別是開始時好像是泛民議員好有興趣搞辭職公投，都現在最反對也是他們，不知是何道理。

有局內人爆料，話關鍵係辭職公投到底是否同退場掛鈎。話說早前有泛民大老覺得佔中搞咗咁耐，搞到旺角這些三山五嶽之地，勢必成為泛民未來選舉的包袱，所以謀劃退場的方案，傾傾吓傾出辭職公投。當時民主黨何俊仁、公民黨梁家傑、社民連長毛都好有興趣傾，甚至傾到誰可以出來選的具體問題。

當時理念係咁，決定搞辭職公投，因為公投要幾個月才發生，就宣布佔領運動取得階段性勝利，進入下一階段，由佔據街頭變成落區拉票，將民主運動帶入社區，咁就可以順勢撤離佔據地。

不過傾傾件嘢就變質，學聯和學民思潮贊成議員辭職公投，但反對將這件事同撤離掛鈎，變成齋辭職公投，又開一個補選新戰場。另外泛民頭頭把建議帶回黨內時，亦有好多不同看法，特別是對支持非本黨成員參與補選的意見特多。

泛民大黨計吓條數，辭職公投若然輸了，先冒失去議席風險，再冒要被逼投票支持政府方案的風險，更加要冒爭拗補選人選分裂自己政黨的風險，但卻不可以換來協助佔領撤退的得益，成件事只是白做，所以反對聲音大增。

 

反而學聯和學民由於不要付出任何代價，加上冒險心強覺得無機會輸，所以就強硬支持辭職公投。成件事轉向的關鍵，係有公投等唔等如退場，搞得成的機會就大減了。

Ariel

** 博客文章文責自負,不代表本公司立場 **

亞太經合組織會議(APEC)由今日起至下周二在北京舉行，期間還有中美元首見面的「習奧會」。阿爺為求會議暢順，不容有失，減少街上人流，讓不少國企放10天假，地鐵很多班次不停天安門站。

香港佔中佔到悶悶地，領導人物傾退場，傾傾吓不知傾咗去邊，學聯變成要在APEC開會期間到北京闖關陳情，學聯提呢個建議時佔中三子都唔知，即使知道亦唔太同意，所以三子之一陳健民都講到出口，坦言只是「被通知」。

學聯上京最可能的結局是不能入境，起碼是學聯執委級人馬應該入晒黑名單，無法入到境。不過學生哥都預咗被拒入境，傳聞之後就順勢去圍中聯辦或其他中央駐港機構。不過到底係在西環增加佔領地，還是叫佔領者轉戰西環，學生哥有不同意見。增加佔領地是將運動升級，由旺角金鐘轉戰西環就有減少對民生影響的作用。不過他們亦可能是明知特區政府要保護中聯辦不被佔據，轉戰中聯辦係想博政府清場。但佔西環呢啲風吹吹吓，最後能否成事都有好大變數。

另外佔中三子又部署集體自首，逼爆警署，順道呼籲結束佔領，將運動轉入另一階段。其中一個時機是APEC舉行會議期間。

學聯和三子各有各搞，隨時在APEC期間搞嘢，怕只怕學聯和三子或許都有少少借搞嘢順便散場的打算，但到頭來他們去了搞嘢打大交，但路上的佔據者又不散，變成愈搞愈大鑊。