政事
Ariel昨日講到政府新聞網上有條「撐警」的視頻片段，由警察公共關係科製作，咁啱昨日經民聯又推咗條撐警短片出街。
經民聯話條「守護法治 支持警方秉公執法」短片，想肯定警務人員一直盡心、盡力、盡責地服務香港市民，市民亦以行動為警務人員加油，為香港打氣。
政壇八卦友關心係唔係田少被政協打柴，經民聯先至咁積極做嘢呀? 原來又唔係咁，據經民聯中人講，其實一早有拍片撐警構思，條片都搞好咗兩個多星期，但中間遇上記者被打事件，又等咗一陣唔出街住，順便又改改內容，所以搞到昨天才出街。
片中有好多市民舉手指公支持警察的畫面，原來並非臨記，完全無蛇齋餅糉成份，係經民聯派人親身落區拍，問市民支唔支持警察，過程反應熱烈，佢地話唔好以為只有阿叔阿伯、阿婆阿嬸才撐警察，落區後發現好多俊男美女，青年才俊也支持警方秉公執法，好多人都想追求社會穩定。
Ariel
** 博客文章文責自負,不代表本公司立場 **
魔童維基在網台開業前發功，宣布同內地互聯網巨頭騰訊視頻達成協議，騰訊視頻將會在內地獨家播放港視的自拍劇。Ariel中午講過可能有變數，晚上又見多咗一個跡象。
話說內地財新網今日下午發出一段關於港視簽約騰訊的報道，傍晚在首頁抽起，在文章所屬的公司分類頁面亦都找不到文章的連結，若然你已知文章標題去搜尋，就仍然有連結直接去文章。簡單點說，文章從主要頁面隱沒。
http://companies.caixin.com/2014-11-06/100747596.html
篇文章題目係「港視簽約騰訊 內地淘金」，副題係「命運多舛，此次簽約內地互聯網最大平台，掌門人王維琪的電視夢能否實現？」由駐香港記者發稿，講述港視這幾年的起跌，包括失落免費電視牌照，又訪問咗維基好友卓博棠，形容“王維琪很聰明，會做生意，稱他魔童就是因為香港人認為他很會把握時機，像變魔術一樣，能把巨人打倒。”
聽落報道都幾正面，同阿爺對維基睇法好似唔太一致，唔知係咪咁聞到燶味，所以抽起隻故仔。
但聽聞內地相關規管部門知道騰訊同港視合作呢單嘢後，都有跌落地的感覺，我估單交易都係凍過水啦。
