網傳杜汶澤鄧紫棋列禁名單

今日內地網上流傳一份文化部最新的查禁名單，圖片上的文件顯示分為兩類，其中何韻詩、黃耀明、杜汶澤，列為不予演出；另有一類為屬嚴控類別，最惹關注係包括在內地爆紅的G.E.M鄧紫棋。

文件仲顯嚴類別係指必須報文化部市場司批准先俾審批，已審批的也要重新報市場司批准先可以演出，同時仲話要溝通演出機構，確保不發生佔中言論。

呢份名單圖片先喺微博出現，之後多個大型網站的娛樂新聞版，包括搜狐娛樂、網易娛樂都有報道，一啲綜合網站，例如文匯網、鳳凰網都有轉截。不過，晚上搜狐同網易就刪去相關文章。

至於呢份名單有幾真就好難講，不過，自從有藝人公開撐佔中後，已經唔係第一次傳出類似禁止在內地演出的名單，都似空穴來風，未必無因啦。

Ariel

** 博客文章文責自負,不代表本公司立場 **

梁錦松做雜誌封面，出來講「佔中是轉機」，被政圈中人評為博亂殺上爭做特首，另一個都想做特首的葉劉淑儀睇唔過眼，就借通識科窒松松。

葉太接受李慧玲訪問，話自己一直提倡的是美國的高水平通識教育，指香港的通識科是「A貨」。事關最初提倡在高中設通識科的，是曾任教育統籌委員會主席的梁錦松，李慧玲就問葉太如何看梁當初推通識科，葉太好白咁話「好有意見」，希望有機會與梁辯論通識，仲話梁錦松對教育的看法功利和膚淺，「好似佢地覺得商業社會，使乜讀文學呀，這樣看待教育是捨本逐末」。

而家建制派認為咁多後生仔佔中，係拜通識教育所賜。Ariel扮葉劉肚裏面條蟲，佢咁講等如彈松松一手搞出通識，搞到咁多人上街，仲話乜嘢「佔中是轉機」?(記住呢啲係設計對白，葉劉官方版本係話佢建議取消通識作必修科和佔中無關)

那邊廂立法會昨日又有人講到「特首」。話說昨日立法會討論是否用特權法查CY，工業界林大輝上周仍然在立法會評彈CY講體育界對經濟零貢獻嘅言論，當時被立法會主席曾鈺成提點問佢係咪政協委員。

大輝上周無答自己係唔係政協，昨日開會回覆曾鈺成，話自己雖然已經做咗兩屆全國政協，但都希望做多兩屆，發言時一定會記住自己的政協委員身份。大輝後來突然叫曾鈺成做「特首」。其後大輝笑笑口話自己衝口而出講咗真心話，不忘叫番句「主席」，以免俾人話佢若有所指。

大輝呢句錯叫「特首」，當然有曲線倒梁之嫌，但亦順道贈曾主席一句，等如話佢想做特首。

香港太多人想做特首，位只得一個，難免日日爭。不過高人提醒大家一句，現在仲仍然是佔中非常時期，建制派唔去打仗，只顧搶位，習大大看在眼裏，又會對這些「特首人選」有何評價呢?