APEC睇大國互動仲精彩

京城今個星期進入APEC熱，部長級會議之後，就係領導人會議，毛拍手好多年前都有機會去過觀摩APEC會議，同所有的大型國際會議一樣，會議共同聲明傾什麼固然係反映當時的全球關注焦點，但大國之間的互動就更受關注。

好似今日就爆出關係冰凍多時的中日首腦，有機會在APEC期間會議會晤，除咗中日關係，當然唔少得係中美之間的互動，奧巴馬在會議後會國事訪問中國，一講中美關係，毛拍手總係想起前國務院副總理錢其琛一番話：中美關係好好壞壞、壞壞好好，好也好不到哪裡去，壞也壞不到哪裡去。

中美兩國之間真係好複雜，在好多國際問題上，例如反恐、地區安全、應對氣候變化等有好大合作空間，但同時亦在好多領域上要爭取對自身發展最有利的環境而競爭，好似今次會議期間，好多國際媒體關注，中國宣布設立的亞洲基礎設施投資銀行(AIIB)，美國好關注呢壇嘢，認為這個AIIB可能挑戰由美歐日話緊事的世界銀行同亞洲開發銀行的地位。

早前，中國、印度、新加坡等21國代表，在北京簽署了籌建亞洲基礎設施投資銀行，加上之前已經敲定的金磚國家開發銀行，都是由中國倡議成立，目的就是在歐美主導的金融機構之外，有更多的國際金融機構，體現新興大國的權重，更好地反映新的國際現實，改善現有國際金融體系中不公平情況。

  

今次趁開APEC，中國會爭取印尼支持，當然美國就唔係咁想啦，到目前，美國軍事盟友南韓同澳洲都無表態支持AIIB。不過，印尼剛換的新總統就話會支持，有媒體仲話佢會在APEC期間親自同習大大表達呢個態度添。

近年阿爺真係愈來愈重視金融領域，雖然中國已是全球第二大經濟體，但國際金融體系仍然是國際貨幣基金、世界銀行、亞洲開發銀行以及歐洲復興開發銀行，全面主導國際金融秩序，中國等新興大國，對全球經濟增長貢獻很大，但對這些機構只有有限的表決權，長期由歐美日等國壟斷。習大大親自掛帥的國家安全委員會就包括埋金融安全。

不過，中美唔會因為一個議題而反面，分歧幾大，中美合作的大框架都要雙方維護，反面對雙方都無好處。中美關係合作有無進展，就要留意習奧會的互動細節啦。

美國另一個頭痕的對手俄羅斯總統普京，亦會到北京出席APEC，兩國因為烏克蘭針鋒相對咗幾個月，目前兩國元首無計劃在北京有正式的雙邊會晤，國際媒體焦點都關注兩人會唔會有非正式的接觸。

總之，國際會議上，國與國之間的互動，都幾有睇頭，大國之間的互動，唔單止影響兩國關係，全球金融、經濟環境都可能受影響，香港要做國際金融中心，都要留意吓呢啲悶悶哋的國際政治會議上，有什麼訊息走出來喎。

毛拍手

** 博客文章文責自負,不代表本公司立場 **

今日官方新華社發布一單新聞：軍隊審計署劃歸中央軍委建制，根據報道，軍委主席習大大早前已簽署相關的命令，今日舉行宣布大會，由兩位軍委副主席親自出席並講話。

聽落好似唔係太吸引的消息，但呢個「小動作」又睇出習大大的思路，從嚴治軍，既要查貪腐，亦要在制度上杜絕一些過去的弊病。軍隊的審計署一直以來歸總後勤部管，依家新的命令係將審計工作由中央軍委直接管，即係話審計出來的結果直接去到中央軍委，去到軍委主席習大大手上。

以往審計署只係總後勤部的手下，試問又點樣查軍中其中一個腐敗溫床—總後勤部自己呢？毛拍手又要長氣點講故仔，軍中近期的一件大案，前總後勤部副部長谷俊山貪腐案，當年的總後勤部政委劉源(劉少奇之子)發現好大問題，要查處谷俊山，都被彈返轉頭，劉源作為政委，已經係總後勤部第二把交椅，都查不下去，更何況叫總後勤部屬下的審計署去查呢？總後勤部負責軍隊的住房、用車、補給等，全部都係「發財」的領域，最需要審計。

依家將審計署由中央軍委管，篇報道講到明，係對貫徹從嚴治黨要求，貫徹依法治軍、從嚴治軍方針，預防和懲治腐敗，對軍委從全域上加強對審計工作的組織領導，增強審計監督的獨立性、權威性和實效性，具有十分重要的意義。

睇嚟軍中兩隻大老虎，徐才厚和谷俊山被查後，習大大都想治吓軍隊的歪風喎。