政事
香港高鐵因為法律限制，西九總站實施一地兩檢的可能性大降，港鐵獨立董事馬時亨早前話，高鐵如果未能一地兩檢，只是「快一點的直通車」。Fit馬呢個講法唔係唔啱，過去單把高鐵睇成為去廣州的快車，可能真係咁。
但有高人提醒，亞太經合組織會議(APEC)提倡互聯互通，包括在該整個亞太地區的鐵路互通，中國又會出400億美元成立絲路基金，就係推動中國接通全亞太區的交通網互通的大計。
中國對外交通連接正在急劇大變中，香港人要留意。 高人話，內地的絲路計劃主要用高鐵橫跨亞洲，如從雲南坐高鐵火車直到緬甸、泰國、新加坡等，香港與亞太地區國家簽證互惠免簽安排，較內地出行更方便，香港可以成為中國新絲路的其中一個出口點。
佢話香港的高鐵是否可調整連接佈局，爭取更大的效益，唔好再睇成為只是香港返大陸甚至返廣州的交通工具，而是中國高鐵出亞洲到歐洲的一個出口點或中途站，如果係咁，就可以用到香港同好多地區免簽證入境的優勢啦。
Ariel
** 博客文章文責自負,不代表本公司立場 **
學聯提出要上京見領導人，講來講去未有下文，暫時停留在叫董伯伯幫拖傳話的階段。但昨日已有學民仔北上被拒。學民思潮昨晚發聲明話，指有成員昨在深圳關口過關時，關員指他參與「違反國家安全活動」，將他遣返。
政界中人懷疑學民仔不甘學聯出盡鋒頭，所以搶先闖關。不過黃之鋒話該成員北上和政治無關。傳聞那個成員只是去深圳和朋友聚會。
學民思潮有600個成員，當中有30多個核心成員，懷疑被拒入境者是核心成員之一，不過不屬平日出來發言的高調成員。學民思潮話好震驚，憂慮組織名單外洩咁話。
高人話，學民仔唔使停留在「憂慮」階段，他們的名單多數已經外洩，其實用一用常識去分析就知。學聯話要北上闖關，而且不一定就是平日出面的頭面人物去闖，你話阿爺的保安部門、公安、國安，係唔係好緊張? 你要咁玩，佢要應對，本來無學聯核心成員名單，都要馬上搵番張番嚟啦，方便要整拒絕入境黑名單時，都有人名在手呀，若然人名都無，實會炒魷啦。搵得學聯名單，又點會唔搵埋學民名單。所有要玩闖關，阿爺無佢地兩個組織核心成員名單，先至係新聞囉。
Ariel反而較關心究竟只是今次不讓學民仔北上，還是往後一直都不讓他們北上? 高人話，照目前情勢估計，阿爺拒絕他們入境主要係應對佢地話闖關，佔中過後，應該無入境問題。阿爺的原則係唔俾香港的佔中反對活動，搞到入內地。
