阻學民仔北上防搞APEC

學聯提出要上京見領導人，講來講去未有下文，暫時停留在叫董伯伯幫拖傳話的階段。但昨日已有學民仔北上被拒。學民思潮昨晚發聲明話，指有成員昨在深圳關口過關時，關員指他參與「違反國家安全活動」，將他遣返。

政界中人懷疑學民仔不甘學聯出盡鋒頭，所以搶先闖關。不過黃之鋒話該成員北上和政治無關。傳聞那個成員只是去深圳和朋友聚會。

學民思潮有600個成員，當中有30多個核心成員，懷疑被拒入境者是核心成員之一，不過不屬平日出來發言的高調成員。學民思潮話好震驚，憂慮組織名單外洩咁話。

高人話，學民仔唔使停留在「憂慮」階段，他們的名單多數已經外洩，其實用一用常識去分析就知。學聯話要北上闖關，而且不一定就是平日出面的頭面人物去闖，你話阿爺的保安部門、公安、國安，係唔係好緊張? 你要咁玩，佢要應對，本來無學聯核心成員名單，都要馬上搵番張番嚟啦，方便要整拒絕入境黑名單時，都有人名在手呀，若然人名都無，實會炒魷啦。搵得學聯名單，又點會唔搵埋學民名單。所有要玩闖關，阿爺無佢地兩個組織核心成員名單，先至係新聞囉。

Ariel反而較關心究竟只是今次不讓學民仔北上，還是往後一直都不讓他們北上? 高人話，照目前情勢估計，阿爺拒絕他們入境主要係應對佢地話闖關，佔中過後，應該無入境問題。阿爺的原則係唔俾香港的佔中反對活動，搞到入內地。

Ariel

** 博客文章文責自負,不代表本公司立場 **

梁錦松接受壹週刊訪問，做晒封面話「佔中係大轉機」，睇到政圈中人側晒目，個個都話松松夠出位，不過出位係唔係好事就唔知咯。

Fit馬馬時亨過去成日話要「馬拉松」，話要做松松的特首競選辦主任，Ariel問起Fit馬，呢啲訪問係唔係佢搞出嚟，Fit馬好大反應，話佢事前根本唔知，後來有壹仔記者叫佢回應松松的說話，佢仲以為松松只係講咗兩句，點知係專訪，仲做埋封面。

Fit馬話，佢已經唔係松松的競選辦主任，已經「辭咗職」，話睇佢連松松接受訪問都唔清楚，就知一切都唔關佢事。佢仲笑笑口講，「或者松松搵咗更高的人幫佢手，所以唔使我啦。」聽Fit馬口氣，又真係唔係幾認同松松用咁方式出來講嘢。

松松在壹仔訪問中話，要等上帝決定佢參唔參選。高人話，睇而家呢個局，很可能否決政改方案，下屆特首都係由選委會選出，咁松松的「上帝」，好可能係北京，咁就要諗吓北京接唔接受松松不斷咁接受泛民媒體訪問，講啲同情佔中的說話啦。

可能松松都知道瀨瀨地嘢，有少少想補鑊。佢昨日到中大崇基學院周會演講時，講到佔中，表示香港因沒有二十三條，令到香港政客可以隨便收外國錢，導致今天的局面。

不過高人話，松松想選特首，要睇睇北京最高領導習大大的性格，習大大好似唔多鐘意呢啲左右逢源的作風，喜歡旗幟鮮明喎。