開場白無提唔等於唔撐

香港佔中持續，正係風雨飄搖之際，習主席在北京會見特首CY，公開俾傳媒拍攝的五分鐘時間片段一出，口痕友即刻話習主席冇講到支持特首同特區政府施政，引來不同解讀，政圈熱鬧起來。

 

官方新華社下午發出新聞稿，習主席在會面中說，法治是香港長期繁榮穩定的重要基石，中央政府充分肯定、全力支持行政長官和特區政府依法施政，特別是為維護法治權威、維護社會秩序所做的大量工作。

 

知情人士話有時應該從阿爺宏觀啲的角度去睇政情，習主席在開場白，先從國家層面，講到剛結束的四中全會，提到落實依法治國的總目標，再提到中央對香港三個的堅定不移。其實從高角度，先談國家的重大事件，再談到香港好正常，再者習主席在公開拍攝時講到的四中全會，是推進法治的重要會議，而講到香港時，其中一個堅定不移係，支持香港依法推動民主發展，又係講到依法，反映咗阿爺眼中，香港現時面臨的問題核心，落實普選係咪要按照基本法，佔中是否對法治造成衝擊，顯示阿爺視「法治」同「依法」非常重要。

 

至於會面中用「疾風知勁草」指CY迎難而上，靠得住，就相當鮮明的表態啦。知情人士又話，習主席認為佔中事件不單挑戰特區的管治，仲係挑戰中央，佢先講到國家所做的工作，在國際層面已向其他國家表明，香港事務是中國內政，其他國家要嚴守不干預的原則。再講到肯定特首、特區政府仲有警隊的工作，中央會繼續全力支持。

知情人士認為，習主席要帶出的信息係，今次面對的挑戰好大，中央同特區係一齊處理，包括在處理普選問題上，中央官員在深圳同上海見咗泛民議員，所以好難如佔中泛民人士所言，中央被特區政府誤導的情況，從習主席問起田少事件，明顯阿爺好了解、亦好掌握香港的情況。

Ariel

** 博客文章文責自負,不代表本公司立場 **

習主席會見出席APEC的特首CY，全城關注習主席公開、閉門講咗乜嘢，Ariel就覺得習主席問到田大少被搣政協柴事件係咪收到效，相當有趣，令人覺得意外之餘，又正正說明咗，習主席對香港發生的情況，真係瞭如指掌。

  

據聞在會面時，係習主席主動解釋咗中央在處理呢件事的決策過程，之後主動問到田北俊被免去全國政協委員資格，是否收到效果。而CY就報告咗最近自由黨在一些涉及政府議題上的表現。

 

高人同Ariel分析，習主席主動問到呢件事，可見阿爺非常重視，如果睇番習主席今日在閉門會議上的前文後理，習主席形容依家香港正面臨好大的挑戰，在呢個關鍵時刻，CY的表現靠得住，與中央步伐一致。

  

高人話呢段話好有意思，即係話關鍵時刻，就知道邊個靠得住，亦都解釋咗點解阿爺今次在田少事件上出手咁快。高人認為，既然依家係困難時期，對建制挑戰咁大，正係需要萬眾一心的時候，咁關鍵的時刻，當然就要睇建制派表現出來的言行，係唔係在同一條隊上面啦，否則阿爺就要嚴肅處理。

  

習主席問事件收唔收到效果，睇嚟田少被搣柴事件，阿爺都係有統一意志去處理啦，信息都幾清楚，在呢個關鍵時刻，政治人物的一言一行，阿爺都(目)及到實。