政事
香港今次股市滬港通失而復得，除了特首CY及財爺鬍鬚曾努力爭取之外，也得到最高領導放一馬，才可以通車。但高人話，唔可以當老奉，以為次次都可以咁。
表面睇嚟，今次滬港通再通車，好似一件事香港好想要，去求一求阿爺，阿爺即使唔願意，最後都會放俾你。高人話今次只係經過各方特殊努力，才有這個成果。
佢話佔中搞到亂咗籠，阿爺對香港的社會秩序，真係有啲擔心。中央想支持香港，但香港面對的挑戰實在好大。好似前金管局總裁任志剛咁講，香港咁樣長始下去唔得。
現實內地唔係鐵板一塊，除了最領導層外，各部委，各省市，各有不同立場睇法。阿爺未來有新絲路、有亞太自由貿易區，有好多新嘢搞，本來可以預香港一份，但不同部門省市，對香港能否維持秩序，有愈來愈多顧慮，唔可以話呢啲擔心唔合理。所以香港人真係要諗諗，係唔係想跟阿爺發展。要跟，就要先保持好本地穩定才成。
Ariel
** 博客文章文責自負,不代表本公司立場 **
上月底中央暫停滬港通，不到半個月又開車，消息人士指出，中央決策轉變的關鍵是特首CY昨日見習主席時，承諾會處理好「佔領」的問題。而早前他亦曾寫報告予中央，承諾香港有決心同能力恢復本港社會秩序。
消息人士指，習主席和總理李克強決定，即日極速處理，重新開動滬港通。
上月底港交所公布滬港通未知幾時開通，消息人士表示，當時阿爺決定推遲是政治考慮，擔心香港社會秩序同法治精神受衝擊。
消息人士說，CY為此向中央提交報告，主要訊息是承諾只用香港的力量，有信心可以解決佔中問題，希望中央可以考慮香港方面希望盡快開通滬港通的訴求。
到昨日早上，CY見習主席後，國務院有關部門用半日的時間，極速處理，所以就有咗今日早上的公布啦。
滬港通由暫緩到開通，可以見到內地對香港決策都有兩難的處境，滬港通不通，客觀作用可為佔中添壓力，但副作用就好似挾住整個香港，亦對特區政府和特首都有壓力。
依家CY一反映，阿爺決定放行，唔好處係減低對佔中的壓力，但好處就收到客觀效果，令人見得阿爺好支持特區，亦好支持CY。
睇番CY昨日見記者講到滬港通時，亦都重申發展金融市場，社會秩序和法治都非常重要，希望社會各界配合。相信這就是他在報告中提及內容。
