阿松講青年台下有反響

在董伯伯的團結香港基金開幕式上，梁錦松有上台發言，話香港有三大突出問題，包括要有效改進的管治制度、人才不足，及青年向上流動。

聞說松松的講稿已修改過調低少少調子，但着墨最多的仍然是青年問題。他肯定佔領的學生追求理想的激情，近日的佔領行動是反映青年追求夢想、理想，在他們身上，就彷彿睇到自己三、四十年前的身影咁話。佢又講回歸17年以來，政府未有處理好青年向上流動、過高的樓價等問題，令他們看不見未來。

有台下聽眾同Ariel講，聽松松咁講有少少刺耳，因為回歸之初，松松先當教育統籌委員會主席，再當財政司司長，如今青年人的教育問題也好，上樓問題也好，和特區首屆政府施政有關，佢好難好似花生友咁，變成客席評論員。

呢個聽眾特別提到教育，話松松當教統局時引入直資制度，學校分流，名校直資化，基層學童入學機會大減。搞母語教育半桶水，大分出中中、英中，基層學童跌入中文中學的大軍中，成為二等公民。除了當年無搞好經濟，落筆打三更之外，這些教育政策，都大大地影響了青年向上流動的機會。還未說搞通識教育，有無刺激了學生上街。

松松身郁郁，到處曝光，但似乎未埋好班，但松松本身都係有條件之一，等佢熱夠身，可能會強勁啲。

Ariel

** 博客文章文責自負,不代表本公司立場 **

董伯伯搞的團結基金會開幕，傳媒焦點集中睇阿松，有少少過份對焦的感覺，董伯步棋未落，阿松借力而矣。

人人睇團結基金開幕有乜人去，Ariel倒轉睇，睇吓有乜人無去，其中明顯無去的是唐英年和任志剛。可能你會覺得無去有乜特別，好多人唔得閒就唔去囉，這些俾面派對，唔係事必要去。

不過Ariel收到另一種風，話團結基金會其實閉門開過一兩次預備會，唐唐和任總都有出席過，亦有發言，但到開幕時，卻選擇唔去，亦唔係俾唔俾面咁簡單，這是一種身體語言，政治訊息，可能佢地覺得「道不同」，但為何如此，可以慢慢解讀。

一講團結，就令人想起2012年選舉時的唐營梁營，當日董伯挺梁，如今話要團結不同派別的建制派，只看開幕禮，就知團結兩個字唔係咁易。