立法會全面開波

早前，泛民突襲成功，在立法會小組委員會報名截止的最後一刻，大批加入財委會轄下的工務小組及人事編制小組，令泛民在兩個委員會都變成多數派，不但可奪取主席一職，更對兩個委員會的表決有決定權。

今個星期開始出招，工務小組委員會積壓咗20項議程，小組主席梁家傑打算開創先河，運用主席權力調動議程，決定應單仲偕要求，將排在較後位置、無爭議的十二項民生議程調前，包括體育館及污水處理廠等。

點知政府突然出招還擊，寫信俾委員會話抽起十三項議程，餘下大嶼山中部水域人工島策略性研究、以及蓮塘/香園圍口岸工程撥款等申請在議程中，而原本泛民想調動的議程中，只剩番馬鞍山發展計劃一項。

泛民建制對政府的做法，當然有彈有讚。梁家傑話所作的裁決本是創先河，確立工務小組主席調動議程的權力，但政府係先發制人，令他「調無可調」。批政府與民為敵，係行政獨裁。提出單仲偕亦斥政府政治掛帥，不惜犧牲弱勢社群的福祉，帶頭掀起政治鬥爭，覺得好心痛。

民建聯葉國謙就話政府「高招」，又勸泛民細想將小組主席的權力無限擴大，日後建制派重奪主席之位後，如何是好？又話泛民可直接否決剩餘的七項議程，但政府可繞過工務小組，直接向財委會申請撥款。上屆工務小組主席盧偉國就認同，政府對工務小組議程的排序有全盤計畫，立法會一向尊重政府排序，甚少干預。

泛民、政府互指對方玩嘢，其實隨著社會撕裂，議會內更係兩種力量的對決之地，以往大家著晒西裝，跟住既定常規來玩，依家議會外都打晒大交，議會內都唔跟以前的常規玩，政府似乎都主動還擊，呢個會期都係刀來劍往啦。

政壇高人就覺得，泛民在議會內搞不合作運動，係雙輸局面，大家都要付出代價，睇近期民調，政團評分齊齊播水，到最後吵來吵去，民生議題被一拖再拖，政府建制固然失分，泛民亦唔見有著數喎。

Ariel

** 博客文章文責自負,不代表本公司立場 **

黃浩想買都市日報的交易，搞咗成年幾，大軍都已進住咁耐，突然爆出一個官司，都市日報集團追黃浩九千萬尾數，都令報業中人十分震驚，到依家先知佢未找尾數。

當日黃浩出價勇進，成功在都市日報集團手上，買得香港都市日報。但黃浩的策略係攞咗個deal落嚟，再搵緊其他股東入股，去完成交易。之前傳過的一個版本，係佢搵過郭炳湘買部分股份，但之後一路都未有確實的消息，唔知件事係唔係進行得咁順利。無論如何，依家搞咗單官司出來，要麼就打官司，一路打落法，否則就要盡快找數解決。

不過，黃浩諗頭多多，較早前報業仲流傳一單嘢，話黃浩去搵新地老二郭炳江同老三郭炳聯，問佢哋有冇興趣收購蘋果日報，想同佢哋一齊去買蘋果。後來，郭氏兩兄弟就覆咗黃浩，話佢哋無興趣投資報業，件事就無疾而終。

從外界觀察，唔覺得肥佬黎打算出售蘋果，不過，諗番轉頭，黃浩作為中間人，可能係四圍去搵人，睇吓有冇興趣去玩，搵到有老細先去接觸肥佬黎都唔奇，無論如何，買蘋果的大計成功機會都相當細。

香港報業競爭大，佔中都一定程度上影響咗零售市道，估計都市日報都受一啲影響，如果收入倒退，的確係會對新股東有啲財政壓力。