上星期一滬港通突然通車，已經引起一些疑惑，阿爺本來都係因為佔中問題，推遲咗滬港通通車，點解最後特首CY上一上去，傾一傾就突然通車呢？
當時有個傳聞，雖然阿爺在政治上都好想滬港通停耐一啲，但國務院方面，由於將滬港通看成係他們的BB，一直都力推盡快通車，結果就推動件嘢成事。
到上星期五，阿爺決定減息，將貸款利率減咗0.4厘，成個局就比較清晰啦，似乎國務院都對中國經濟放慢、出現通縮危機，有啲心急，依家已經係十一月近尾，距離年底只有一個月多一啲，中國十月初公布的第三季GDP只得7.3%增長，頭三季加埋平均都只係有7.4%的增長，距離全年目標7.5%愈來愈遠。
一直有個說法，國務院仍然係GDP派，唔希望中國的GDP增長放得太慢，所以想方設法要谷經濟，滬港通引南水去北上買股票，好明顯有刺激股市的作用，所以國務院力促滬港通盡快通車，可能都唔純粹係話因為搞咗唔想停，而係話佢呢個BB去催谷經濟。睇埋減息，你就會睇到國務院係臨年尾做緊一系列的政策，希望盡最後努力催谷吓經濟。
這些政策措施唔係一時三刻設計出來，睇怕都係部署咗一、兩個月的時間，在呢個時候盡快推出，希望谷番最後一浸GDP上番少少，等年尾埋數的數字好睇啲。
結論係阿爺對香港的政策，有時考慮都幾複雜，有處理香港問題的因素，如涉及其他領域，例如經濟方面，也會有考慮中國全局的因素，總的來說，都唔希望香港問題影響到阿爺的整體部署。
毛拍手
** 博客文章文責自負,不代表本公司立場 **
內地鳳凰周刊前兩日大爆中央軍委前副主席徐才厚被查抄內幕。最多人關注，都係辦案人員從徐才厚二千平方米豪宅地下室內，起出美元、歐元、人民幣等現金，足足有超過一噸重。其實這篇報道，除了在徐老虎家中抄到幾多現金、寶物之外，亦都披露了不少查他的細節，相當有趣，對了解政局幾有意思。
話說兩年幾前，當前總後勤部副部長谷俊山被調查後，徐老虎屢被傳捲入谷俊山案件，這些傳聞空穴來風，未必無因，皆因在總後勤部上上下下，都知道這位副部長谷俊山「朝中有人」，連當時總後勤部長廖錫龍都不放在眼內，報道話谷俊山多次頂撞廖部長。到劉源(劉少奇之子)空降總後勤部出任政委後，谷俊山在拉攏和試圖「媾和」不成後，就對劉源開火發飆，毫不避諱稱自己背後有強硬靠山。
報道引述知情人士證實一個毛拍手寫過的消息，以劉源為首的總後政委，將谷俊山有關案件，直接報俾當時軍委主席胡錦濤同副主席習近平，得到支持而查辦。在谷俊山被調查前，徐老虎仍然想保他，谷俊山送咗4000幾萬賄金俾徐老虎，但谷俊山被調查後，覺得無人可以保到自己，於是開始如實交代，結局就係依家咁，大家有眼睇。
而徐才厚在2012年退出中共領導層，按道理應該仲會現身2013年的兩會，出席埋卸任國家軍委副主席的會議，但他全程缺席，當時引起了不少遐想，毛拍手好有印象，當時有位認識總政中人的朋友，仲好認真咁話徐才厚只是病重，不是出問題，事後看這位朋友政治觸覺仍不足，低估了習大大打老處的決心。
不過亦難怪，當時軍方官媒以看似無意咁以《徐才厚為王喜斌專著作序》為題發表消息，打消外界對徐已出事的猜測；當時徐老虎確係因膀胱癌在軍方醫院醫緊病，病情得到控制後，到咗2013年國慶招待會上，身著戎裝的徐才厚以退休軍隊老領導的身份出席，今年1月20日，中央軍委慰問駐京部隊老幹部迎新春文藝演出活動上，徐才厚再在中央電視台報道鏡頭中兩次一閃而過。鏡頭中徐才厚滿頭白髮示人，身形消瘦，面帶微笑，海內外輿論於是紛紛猜測徐已「平安無事」。
有冇事，相信只有徐老虎知道，報道指在2013下半年，徐老虎愈來愈惶恐，今年春節前，決定出來走動走動打探一下，「徐才厚跑到海南三亞轉了一圈，卻無心看風景，而是以看望在那裡休養的老領導為名，到處請托和求助，企圖脫罪免責，平安過關。徐才厚並沒見到他想要見到的人。但從三亞回來後，徐卻到處放風，跟人說他沒任何問題了，老領導都給他打了包票。徐似乎也自以為從此可以高枕無憂了。」
呢段真係相當有意思，近年301軍方醫院有間療養院在三亞落成，好多退休領導冬天期間經常前往短住一段日子，徐才厚去到處搵人求助，相當反映內地政情一種表現。而徐才厚並沒有見到想見的人，到底係邊個，報道無講，真係令人有多想像空間啦，返到北京，他放風話老領導都給他打了包單無事啦，徐老虎退休時已官至軍委副主席，他心目中想吹的老領導應該得幾個，結果就冇人保到他，今年3月15日被正式調查，又係兩會一結束就出手，同薄公子一樣。
睇完呢篇報道，毛拍手有啲感慨，唔好話港人，原來活在京城的政壇中都有人迷戀以前的遊戲慣例中，好似徐老虎咁，都明知無力保手下，仲繼續收錢，當時他一定仍然相信：「點會查到我政治局委員兼軍委副主席身上呀！」睇嚟境內外的政客都要諗吓啦。
