長者新玩意︰電子飛鏢

講起飛鏢，大家或者以為是後生仔落bar玩的玩意，但原來老人家一樣玩到，仲玩得好開心！

Jack 尋日參加咗《全港退休人士新手電子飛鏢大賽暨同樂日》，見到近三十組，50歲或以上的哥哥姐姐參與個人同隊際電子飛鏢比賽，人人都玩到有板有眼！

電子飛鏢運動新穎又得意，長者都好鍾意。

傳統長者運動都好簡單，唔駛太多技術，以兼顧到長者身體機能退化及活動能力下降；早前就有個調查發現，差不多三成長者因屋企擔心，就放棄做運動，真係好可惜！

但電子飛鏢就好唔同，呢種睇起嚟年輕人專利的運動，原來既刺激又富趣味性，可以話係「室內體育娛樂之王」，更唔受到年齡同埋身體限制，對心理質素、手腦協調、身體肌肉甚至數理能力都好有幫助，啱晒「老友記」玩。

睇吓就知佢哋玩得開心啦！

比賽仲請前世界賽冠軍選手Paul Lim，即席分享吓玩飛鏢的樂趣同投擲技巧，原來手指公、食指同中指執鏢時，要好似揸執筷子、毛筆咁，又要執行馬步，眼對準目標手直線放出。

Paul話有飛鏢三部曲︰手準備、拉後、用手腕力放出，仲要記住唔好用「死力」，加上夾啱時間，太遲太早都唔得。

比賽由聖雅各福群會主辦，佢哋上年第一次將電子飛鏢帶入長者中心，發現好受歡迎，嚟緊會繼續將呢種既新穎，又富挑戰性的健康運動引入長者社群。

中西區長者地區中心社工張海華話，長者由工作崗位退落嚟，好容易失去動力同方向；擲飛鏢就正正要求目標清晰明確，過程又能激發參加者鬥心，啱晒退休人士重拾滿足同成就感。電子飛鏢又「重技術、輕體力」，只要掌握到基本技術、用法同力度等，即使行動不便、坐住輪椅甚至或患有腦退化症的長者都參加到，甚至參與國際性比賽添！

聖雅各福群會嚟緊會舉行兩場電子飛鏢入門工作坊，50歲或以上退休人士同長者都參加得！有興趣的話不妨報名，等自己拉近同後生仔距離，一點都唔out！

電子飛鏢入門工作坊

日期：12月13日及12月20日（星期六）

費用：免費

查詢：2805-1250

Jack

** 博客文章文責自負,不代表本公司立場 **

Jack之前介紹過社企茶室，老友間反應不錯，講起社企愈來愈多，真係花多眼亂，點知邊間社企幫襯得過呢？唔駛驚，終於有組織幫社企「驗明正身」，幫大家簡單辨認社企，亦鼓勵社企進一步發展！

社企總會仲請到財爺曾俊華頒授認證。

呢個社企認證標誌叫做「SEE Mark」，係一隻帶住紅色眼鏡的企鵝仔，大家只要認住呢個標誌，就知道呢間社企已獲得認證，可以放心消費同享用服務啦！

首批獲取認證的20間社企，合共有超過38間店舖，都會張貼「企鵝仔」。佢哋亦會喺廣告、網頁、咭片上展示認證標誌，等顧客及公眾人士識別。

獲認證社企名單

「社企認證」研究計劃以英、美兩地做藍本，參考海外和本地不同專業組織和政府部門的做法。認證分為四級，分別係「創啟級」、「創建級」、「創進級」同埋「創越級」，分別用唔同顏色標示。

好似「創啟級」，社企就要計劃喺12個月內開始營運，又或者營運不超過兩年，要去到「創越級」，就更加要營運到五年或以上添！

計劃會以八個範疇評核，好似有「社會使命、創新與價值」、「人力資源政策與實踐」、「財務管理」、「良心消費與文化傳播 」同埋「顧客滿意度」等。

首批獲認證社企，恭喜！

好似長者安居服務協會，就攞到「創越級」認證，聖雅各福群會的「Green Ladies」就係「創進級」。

社會企業總會會長郁德芬同Jack講，香港而家有成457間社企，相信呢個計劃會提升社企透明度同問責度，期望三年內，會有超過三分一本地社企獲頒授「企鵝仔」，遲啲仲想將計劃拓展至內地，帶來更大福祉添！