CY:拉布損失十三億

報業公會轉眼走過六十年，值得賀一賀，傍晚舉行酒會，好多官商名流出席。特首CY都有出席兼致詞，佢話自己同報業好有聯繫，因為細個時阿爸叫佢睇多啲報紙學認字，睇工商日報，有兩個專欄，一個山川人物，一個花鳥蟲魚，大個少少就投稿去報館，賺啲稿費，後來從政，同報館亦好有聯繫。

CY仲話對報業公會60周年好有感覺，自己都60歲，同報業公會同齡。

話鋒一轉，就講到比較嚴肅的內容啦，講到佔中，是幾個月的考驗，話非法佔領依家已經過去咗，即將開展政制諮詢，佢又特別提到拉布，令政府工程造價用多13億，借機都插下拉布，Sell吓硬嘢喎。

同場，唐唐都有出現，但唐唐早走咗，所以兩人碰唔到面啦。

Ariel

** 博客文章文責自負,不代表本公司立場 **

壹傳媒集團創辦人黎智英被捕後，先後辭去《蘋果日報》社長和壹傳媒主席等職務，壹傳媒通告的官方原因是肥佬黎「追求個人興趣」。睇《蘋果》的報道都幾過癮，呢段新聞做得好中立，走去問多位壹傳媒高層，均稱不知黎有甚麼「個人興趣」，報道又提及壹傳媒集團昨發出人事公告，提及黎會「繼續着手極具潛力的數碼傳訊及媒體發展」。

但《蘋果》記者昨致電肥佬黎查詢其個人興趣，黎只稱「唔想講」、「冇嘢講」、「一言難盡」、「而家唔講住」；搞數碼傳訊都似係肥佬黎個人興趣，但話佢因呢個個人興趣辭職，就好難搵人信啦。

《蘋果》的報道又提到接任社長的葉一堅強調，報紙支持民主自由是不會變，但他和肥佬黎接觸時覺得，報紙有可改善空間，有時予人覺得太過偏向一邊、一面倒，可以向中間靠攏多一點。他引述黎指，現時社會因藍、黃絲分裂，傳媒有責任不應令社會分裂，希望社會和諧；有讀者亦指出有類似問題，報紙不能自己想做甚麼便做甚麼，要看社會和讀者需要，「是收起激情，多些智慧的時候」。

嘩，肥佬黎都講「和諧」，即係佢報紙成日講的「河蟹」，又真係大新聞喎，仲話《蘋果》要向中間靠攏，咁講真係令人耳目一新。不過報壇八卦友又加把咀，肥佬黎的說話雖然係最高指示，堅哥雖然係社長，但係佢地都係報館的「建制」，佢地講啲嘢，下面啲朋友仔聽唔聽架? 小朋友好反建制架喎。

講開又講，肥佬黎辭任壹傳媒主席，由CEO張嘉聲暫時做代主席，傳聞堅哥係接任主席的熱門人選噃。