炳聯落淚 大難不死有後福

新地案許仕仁、郭炳江四個被告中晒，只有郭炳聯脫罪，佢雖然無事，聞判時都眼泛淚光 並用紙巾擦眼淚。宣判後郭炳聯離開高院大樓5樓法庭後，走樓梯到4樓會議室坐下，雙手抱頭。在會議室內一度除下眼鏡拭淚，然後和代表律師研究陪審員裁決比數的清單表。

 

呢單嘢佢二佬郭炳江中咗一條串謀公職人員行為失當罪，話佢串謀許仕仁擔任政務司司長時優待新地，以換取850萬元。條罪唔輕，依家郭炳江要還柙，就算保釋出來都做唔到董事。

新地官司由家族糾紛開始，大佬郭炳湘同兩個細佬鬧意見，後來阿媽支持兩個細路，趕咗大佬出新地管理層，有人好不滿走咗去廉記投訴，鬧出呢單大案。

如今二佬入冊，三弟炳聯大難不死，必有後福，未來新地大業，勢將由他掌舵。世事好難講，估唔到結局係咁。鬥到咁，成個家族都好幾傷。

想當年老爸郭得勝在生時，決定不分家，唔希望死後拆散新鴻基，才叫三兄弟共同管理。估唔到當日唔分家，會種下今天的惡果。

Ariel

** 博客文章文責自負,不代表本公司立場 **

許仕仁、郭炳江入冊，認真大新聞，這些大人物去坐監，生活難捱，唔止無自由失自由，一應生活用品都唔會係高檔嘢，真係用唔慣都要用。

據熟悉許老爺的人講，佢係煙剷，基本上煙駁煙，估佢入獄最難頂的其中一樣，恐怕係食「Wealth」牌香煙。

吓，乜嘢嚟架? 原來係咁，監獄當然無香煙供應，好多嘢由探監親屬提供。但唔係乜嘢都可以帶入去，懲教署定晒所有可以帶俾犯人的生活用品准許的牌子，香煙就係呢隻「Wealth」牌啦，寫明是「已完稅累計持有不多於16 包 ，每兩天派發1 包」，即係一日得半包，想食多啲都無。

查一查呢隻香煙到底係乜，網上資料顯示，原來係祖國紅雙喜的相關公司天天威富投資有限公司出品，話佢「成功創出另一高水準超國際級香煙並命名為『威富WEALTH'－財富香煙』」。 睇落都好堅吓。

許老爺真係食唔慣都要硬啃，想食番萬寶路之類來路煙? 據監獄風雲版本的消息話，要等太平紳士嚟監獄巡視之時，因為懲教署職員唔想出事，會叫啲犯著番衫，唔好講粗口，唔好食煙，當然唔好投訴，啲犯合作的話，太平紳士走咗，懲教員私下就會派萬寶路之類香煙俾囚友嘆。

 

另外各類可帶入監的生活用品都有規定，例如毛巾當然係國產名牌「祝君早安」啦。驅蚊貼就係「史激它」牌子。女犯用品更人性化少少，衞生巾係「護舒寶」 乾爽瞬潔貼身護翼夜用裝，仲可以用「露華濃」 ColorStay Ultimate Suede紅色唇膏(其實坐監用唇膏嚟做乜?)