民主黨立法會議員何俊仁宣布在政改方案表決後請辭，要觸發變相公投，借此重啟政改。此議一出，即使泛民其他政黨都鬧爆，主要問題是等政改投票後才辭職公投，又有何用?
首先更新一下大家對辭職公投的記憶，就在去年10月，佔中佔到唔上唔落、蔓延到旺角打大交之際，一班本來發動佔中的泛民uncle(學民黃之鋒的用語)，包括肥佬黎、李柱銘、何俊仁等，覺得唔係幾對路，怕佔中搞下去，被學聯、學民思潮騎刧，最後爆大鑊，成為泛民未來選舉的負資產，就想捉住雙學收繮。當時他們諗出一條絕世「好」橋，建議成立一個包括雙學、佔中三子和泛民政黨的平台，想搶回雙學對運動的決策權。
初時雙學不肯就範，肥佬黎老友陳樞機就出口，大罵學生，最後終於逼出一個泛民平台。就在平台內，泛民提出可以用辭職搞出變相公投，讓佔中就有一個下台階撤退。怎料學生話公投應該搞，佔中不可撤，雙方僵持不下，不了了之。
如今佔中完了，鐵頭仁又重提辭職公投，不知是他個人發動，還是一班泛民uncle齊齊度橋。但最令人反感的是要在政改表決之後才請辭，而不在投票前辭職公投。現實上只能有一個解釋，怕輸。這些問題去年佔中時在泛民平台內已傾過晒，辭職公投建制派很可能不參與，如何令他們參與？要話明賭一舖，如果建制派在補選中取勝，泛民就會投票支持政改方案，這樣建制派才會玩，但泛民又無信心取勝。如今民調顯示支持通過政改方案的市民近半數，多過反對市民，鐵頭仁現在搞辭職公投，當然無信心賭呢舖可以贏，所以唯有就在政改投票之後才辭職。
鐵頭仁只和民主黨傾好，就出來宣布，無和其他泛民政黨磋商，難免令人覺得民主黨有選舉考慮。該黨在佔中期間一直不是主角，但又要負上佔中包袱，未來都幾擔心在今年區選和明年立法會選舉中大敗，如今發動辭職公投，搞番一場大龍鳯，到辭職後幾個月，鐵頭仁和民主黨就可以如佔中時的周永康和黃之鋒那樣，日日上電視，期期質政府，讓民主黨重新成為舞台上的主角。
不過這一切只是鐵頭仁一廂情願的想法而矣，他又要補選又怕會輸，根本就是古惑仔「又要威又要戴頭盔」的行為，而且個頭盔大到無朋友，成塊面都遮晒，安全度夠晒，但一啲膽量都無，怎樣做民主派領袖？
等到政改投完票，方案否決埋，建制派絕無誘因參與，何俊仁辭職，搵番個自己黨友去補選，無競爭下當選，又如何可以逼到政府重啟政改？白白花去兩億公帑搞補選，納稅人向誰問責？恐怕民主黨明年立法會選舉，不止要找佔中數，還要找這一筆胡亂辭職數。
盧永雄
政改第二輪諮詢開動，最後提交政改方案上立法會，要有三分二議員通過，而家計盡所有非泛民議員都投票支持政改方案，還欠4票，理論上要在泛民27個議員中拉到4個人轉軚支持政府，政改方案就可以通過。
接著大家又數，公民黨湯家驊、民協馮檢基、衞生服務界李國麟、會計界梁繼昌以及資訊科技界莫乃光，都好像是撬票對象喎。講就易，實際上機會認真唔大，有官場中人就講起10年前一個「半夜襟鐘仔」的故事，證明撬票呢家嘢，不是眼睇咁容易。
首先大家不要心邪，不要聽起「襟鐘仔」就諗到砵蘭街，官場中人講呢個鐘仔係上亞厘畢道禮賓府個鐘仔。時維2005年，煲呔曾新上場做特首，興致勃勃去推政改，當時情況類似，欠泛民5票，才可以通過政改方案。煲呔曾和現已身陷窂籠的難兄難弟肥龍許仕仁，講到口水乾都未夠票。
去到關鍵時刻，唯有搵阿爺幫手，阿爺都算唔話得，打晒電話，用埋平常的關係，話搵到6個泛民議員，聲言「他們會轉軚支持政改方案」，找他們傾啦。阿爺講到咁實故實鑿，煲呔、肥龍雖然半信半疑，都在禮賓府開局，叫幾個被點名的泛民一齊去傾。不過人未到，記者先到，肥龍在禮賓府門口抽煙順道等人時，已發現有某大報記者在門口等影相，肥龍暗叫不妙，入內向煲呔報告，計一計數，這樣秘密的會議，政府高層不會放料俾記者，唯一可能是與會者做人情向報館通水，但叫得人來影，固然不會話「我轉軚啦」，當然想扮吓嘢話「我好鐵無轉軚」啦！
結果個會可以用「古靈精怪」四個字來形容，7、8、9點都有人到，準時者少，其中一個應該出現但一直無出現。出現者好多嘢講，其中一個「鐵娘子」就大發議論，講佢如何堅持民主之類。煲呔和肥龍愈聽愈覺唔對路，「乜呢啲人唔係同阿爺講咗佢地可以轉軚咩？點解而家又講啲相反詞呢？」好明顯個個不想得罪阿爺，對阿爺講一套，在香港又做另一套啦。會面結果不歡而散。
最經典的還在後頭，散晒會半夜一點，有人去禮賓府襟鐘仔搵特首，守門的警察報上去搵人叫醒已經瞓咗的煲呔曾，煲呔睡眼惺忪行落樓，從對講機那裏才知道是一直無來的男神泛民議員，佢話「唔好意思我老豆入咗醫院，而家先至搞完得閒嚟，你地傾成點呀！」「吓，你而家至嚟，一早傾完散晒咯喎。」「哦，咁無計啦，我走啦。」半夜俾人叫醒的煲呔，自然懷疑對方玩嘢啦。事後總結這樣去撬散票，無辦法成功，下一屆再搞政改，煲呔就向政黨埋手，結果拉了民主黨同意支持超級區議會的方案。
2005年的處境和如今接近之處，是有多數市民支持政改方案，但泛民反對。如今民調顯示有超過五成市民支持政改方案通過，但泛民議員就是反對，他們更聲言不會做民調，顯然也知道民意取向。或許歷史不斷正在重覆，今次亦如2005年一樣，政府撬票不成，政改原地踏步，市民不滿累積，等5年之後，就逼到泛民政黨轉軚支持了。
盧永雄
