長實和黃在美國大升10%！

昨日新聞多，房祖名判刑，鐵頭仁玩辭職公投，誠哥搞重組，法國追捕恐怖份子，論畫面自然係法國槍聲卜卜吸引，但長和系重組，都引起唔少關注。

政界議論誠哥係唔係遷冊，不過股民最關心的是重組對股價的影響，昨日Ariel收到幾個朋友訊息，都話揸咗長實或和黃，見重組新聞咁複雜，問對股價有乜影響。

Ariel唔係股票專家，有料都係聽人講，但搵料仲幾在行，就搵咗港股在美國的預託證券(ADR)股價俾佢地睇，睇完個心本來好忐忑的股民，即時定晒，因為股價升呀嘛。

到美國收市時長實升咗10.29%，和黃升咗10.31%。咁橋兩隻都係升咗10%多啲，和黃仲升多少少，和黃股民條氣即時順番晒。

一般行貨解釋，因為重組將兩間公司隱藏資產價值體現出來，所以股價上升。而兩間公司市值升近700億，誠哥身家一晚都多咗200幾億啦。

Ariel

** 博客文章文責自負,不代表本公司立場 **

民主黨鐵頭仁「突然」宣布在政改方案被否決後，辭去立法會議席，搞變相公投，呢個舉動，建制派未開炮，泛民各友好先開炮，呢次鐵頭仁的舉動，唔單止其他泛民中人感到詫異，在民主黨內部也引起好大爭論，泛民其他戰友都話未係太了解到底發生咩嘢事。

泛民中人估計，民主黨大佬們應該被後生派挾得好緊要，講得白啲，就係逼宮，民主黨自從上次政改一鑊和阿爺妥協後，被激進泛民狙擊，黨內後生一輩已經有好大意見，加上今次佔中一役，民主黨完全好似無冇表現咁，「乳鴿們」更覺失落。

今次鐵頭仁咁做，做一個强硬姿態，幾明顯係為黨的年輕化做部署，緩和內部矛盾，為後生一代在未來的區選同立會選舉舖定路。

之但係咁做，可能可以一時紓緩到內部的矛盾，但肯定會得罪其他泛民友好，又是否值得呢？