政事
民主黨鐵頭仁「突然」宣布在政改方案被否決後，辭去立法會議席，搞變相公投，呢個舉動，建制派未開炮，泛民各友好先開炮，呢次鐵頭仁的舉動，唔單止其他泛民中人感到詫異，在民主黨內部也引起好大爭論，泛民其他戰友都話未係太了解到底發生咩嘢事。
泛民中人估計，民主黨大佬們應該被後生派挾得好緊要，講得白啲，就係逼宮，民主黨自從上次政改一鑊和阿爺妥協後，被激進泛民狙擊，黨內後生一輩已經有好大意見，加上今次佔中一役，民主黨完全好似無冇表現咁，「乳鴿們」更覺失落。
今次鐵頭仁咁做，做一個强硬姿態，幾明顯係為黨的年輕化做部署，緩和內部矛盾，為後生一代在未來的區選同立會選舉舖定路。
之但係咁做，可能可以一時紓緩到內部的矛盾，但肯定會得罪其他泛民友好，又是否值得呢？
Ariel
** 博客文章文責自負,不代表本公司立場 **
長和系重組變身，誠哥親自見記者解畫，除咗公司重組，當然亦被記者問到是否支持政改方案按人大常委框架通過，誠哥都有備而來啦，佢話「如果政改唔行多一步，原地踏步的時候，對香港的損害，是無可估計的，因為政制一定要進一步，如唔行前一步，香港人全部都係大輸家，你同我都一樣。」
誠哥對呢個問題好有睇法，詳細咁講，進一步解釋點解希望政制向前行：「行多一步，最低限度，我哋第一次，香港人一人一票去選特首，選時你有三人可以俾你選擇，任何情況都希望政改能夠過，如果唔過，有咩嘢好處，我就睇唔出。以我個人來講，對呢方面我睇得好重，你冇第一步，何來第二步，何來民主進展呢？所以難得有咁的機會，希望我哋政改通過。」
誠哥見記者一向都係金句多多，今次見記者講到政改，「大輸家」呢個詞重申咗多次，都好強調政制原地踏步，香港人齊齊變大輸家，仲強調「你同我都係輸家」，睇嚟佢真係好支持政府，希望政改方案可以通過喎。
政改係特區政府當前頭等要務，誠哥咁幫口，都算好俾面政府啦。
