特首CY自爆外部勢力參與佔中詳情，直指按爆料電郵顯示，戴耀廷向港大捐錢是用滙豐觀塘分行本票，而黎智英捐錢予民主派也是用同一分行本票，可見外部勢力插手佔領運動的端倪。泛民大力反駁，工黨主席李卓人更諷剌話梁振英咁講「滙豐門口對石獅子都會笑咗出嚟。」
係唔係咁好笑見仁見智，泛民覺得CY理據不強，Ariel覺得問題是以佢的性格，點解要講，仲要好有部署咁講。成件事他前晚出席前港區人大代表吳康民《「佔中」是怎樣煉成的？》新書發佈會上開始，那個活動只有《文匯報》及《大公報》等內地傳媒可以入內採訪，CY選擇在這個場合講，到昨日內地新華網轉載，本地傳媒才跟進。由披露手法講，這是有心安排，要將他原意出街，不是隨口講大咗。
這個「滙豐觀塘分行本票」的線索，到底是捕風捉影，還是見微知著，只是一線之差。政界人士話CY十分深謀，之前的民情報告，為何不加入此內容，到底因為這不是民情、他自己覺得不宜在這樣正式的報告加此內容，還是負責官員不願加，值得研究。總之CY十分想這個「端倪」出街，不介意、甚至想自己親口講。
預計佢認為此舉代價比想像中少，收穫比眼見到大。若無佔中，這些說法會令一大批中性市民，對政府反感，但佔中之後，已無中間空間，所以這樣講代價有限。但有幾方面的收穫，第一緊跟中央立場。中央政治局常委會在9月30日會議上把佔中定性為顏色革命，並不因這場運動失敗而改變。咬定它是外國勢力策動，可向阿爺證明自己立場堅定。第二可鞏固藍絲，他爆料當天是蘋果受燃燒彈恐嚇之日，輿論比較同情蘋果，CY咬定肥佬黎背後是外國勢力，有鼓動藍絲支持者的作用。第三，恐怕政府的行動，不止於此，往後還有後著。CY的動機，一石三鳥。
聞說「壹傳媒股民」分兩次爆出千多份文件，再加爆出港大文件，CY自己睇晒，不假手於人，逐份研究，佢都係半個專家，睇文件不會比調查的差人少呀。
Ariel
** 博客文章文責自負,不代表本公司立場 **
