九陽神功實戰篇

上星期我提到買股票要好似練九陽神功，揀一些簡單而正路的方法，睇準比較大隻，例如等H股大股的股價，在回落得比較多的時候買入。不要高追，只宜低吸，買了之後，坐一段時間才慢慢沽出。這才是玄門正宗的功夫，比較王道，總好過日日買出買入。 

想不到剛講完練九陽神功，練功的機會便來了。今個星期一，大陸股市大跌市，搞到港股亦插到阿媽都唔認得。可能係我講得太多玄鐵重劍、九陽神功之類的招式的緣故，很多網友留言給我，說他們買了萬科（2202）、中海外（688）或者南方A50（2822），不少人是分注買的，大多數都是分三注買到兩注，或者一注，問我點算。

這種實際發生的練功機會，最好用來講解如何實際操作。例如我上星期講嘅萬科，佢年初高位抽上20.35元，上星期寫文章的時候18.38元，股價跌了一成，我當時叫大家不要高追，等回落至17.5元才吸納，再跌深些，再買，然後等到上破高位的時候才沽出。

網友Andrew說，他跟我的做法，想買三注，打算在17.5元、16.5元及15.5元買入。結果只買了兩注，股價便反彈，買唔到第三注，問我點睇。按我自己慣常的做法，對一些有前景的大股，會分段低吸（記住！是有質素的大股，細股千萬不要這樣向下買）。如果買了兩注，未買齊，見佢反彈回升，便判斷是否應該買埋第三注。

睇萬科在周一大跌日後第二日的走勢，及中國證監會周一晚放話托市的口術，其實可以在17元上下，追埋第三注。不過，追不到也不要緊，三注買了兩注，也不算少，平均價17元，與現價17.86元比較，仍有進賬。你問我跟住點做？我建議不妨坐一段時間，不用太心急沽貨。股市的短線走勢，是很難看得透的，大市插落之後又反彈不少，再回一些，毫不出奇。

在黑色星期一，大陸A股暴跌超過7%，很多金融股A股當日都跌停板，已有很多斬倉盤隊了出街，短線已經消化了相當部份之前急升上來的沽壓，大市反而變得健康一些。固然，短期後市，究竟係反覆向上，抑或再回一回，難以估計。但以兩個月的中期而言，我仍會睇好。大家睇睇萬科的圖，上落相對厲害，上一浪高位20.35元，在1月5號創出，低位是星期一造的16.14元。高低位差4.21元，上落超過20%。如果平均在17元坐貨，我覺得不妨持貨久一些，如果大市朝著預計的方向發展，萬科下一浪大有機會升穿上一個浪的高位20.35元，估計會升上21元樓上，甚至22元。大家也不要睇得太盡，在21元樓上沽出，已有很理想的回報，呢個就係我嘅如意算盤。

不過，大家又要記住，如意算盤唔一定打得響。期待如意算盤打得響，需要不斷監察市況的發展。如果萬科股價上唔到上次高位20.35元，未穿先回，跟手深度回落，跌番去14元、15元水平，證明上升走勢已經逆轉，可能要搵位沽貨或者止蝕。又如果股價升到20.35元，但又不能上穿，形成一個雙頂回落，雖然未有上唔到高位咁差，但走勢其實也不好，估計將變成橫行走勢，最好順勢食糊。

如果大市如我們估計，是反覆向上的走勢，萬科也會上升到另一個高位。就可按計劃在升穿高位沽貨之後，然後等佢回落十幾巴仙再買過，希望一年可以食到兩、三轉。股市，其實就是一個「估」字，既然大家都在靠估，切忌一成不變。不過，揸住萬科這種國內屬龍頭的房地產股，相對地會安全一些，理論上可以揸長時間一些，希望能夠食到兩三個上升波浪。股市短期的升跌，可以不理，只要走勢能夠在一、兩個月內按自己預計的方向出現，已經很好啦。大家不妨反覆試試，練下功夫。

陸羽仁

** 博客文章文責自負,不代表本公司立場 **

早兩日在網上見到網友Lost Confidence的留言，佢話 「聽陸SIR教導, 唔好高追, 調整先買, 有糊先食一半, 唔買雞股, 買H股大股, 學到陸SIR一半功力, 都應該有D收成」。網友Lost Confidence這幾句話，的確總結了我經常同大家講的買股心法。

我又記起一個故仔，去年9月和一個中學同學打完籃球，在回程時他問起我，話買股炒上炒落無乜得著，唔輸都偷笑咁款，我就花咗半個鐘，叫佢試吓用主要的錢，買2822(南方A50基金)或者2823(安碩A50基金)，在低位買吓，等佢升高咪沽吓，好過爛炒啲細股啦。後來同學同我講，佢要到11、12月先至諗明我講乜，雖然反應慢，結果都買咗，都有啲斬獲。

我觀察散戶的投資行為，發現他們有不少投資弊病，最典型的是喜歡搵冧巴炒細股，博買中就升10倍。在過程中可能也會買中，固然不會賺到10倍，但賺三、四成的已經不俗啦。不過，在不斷的買買賣賣，炒來炒去，最後都係輸番晒。我之前寫過幾本書，都係講這些細股背後，都有莊家，當中有很多投資陷阱，專陰老散。

要避開這些投資陷阱，最簡單的就是還原基本步，要搞好自己買股的心法。其實Lost Confidence講得很好，如果唔識買股，就唔好買雞股，要買指數股，或者H股大股，就可以輸少好多。我形容買三、四線股博發達的人，便好似練《葵花寶典》，我唔敢話一定唔得，夠膽引刀自宮，或者真係可以成為一代武林高手，不過，一般人的結果都係自宮之後，只係自宮咗。其實，練《葵花寶典》，似快實慢，很多時候是賣《葵花寶典》的賺了錢，練《葵花寶典》的卻沒有得著。

相對嚟講，我教大家的心法，就玄門正宗少少。就好似《九陽神功》入門版咁，睇落有點鈍，招式（冧巴）又唔多，過程有點悶，唔多出彩。不過，如果跟得到的話，卻會有相當的斬獲。我聽到有不少散戶話，跟了這個心法幾年，買股開始有錢贏。對此，我不無驚訝：原來很多人買股都係輸錢！按道理，投資股票，雖然股市上上落落，但睇住個指數，應該唔會輸錢。例如你在這10年、8年間買股，由恆指低位買上來，都已經升了三、四成！每年又有兩厘幾息，即使你買盈富基金（2800），都應該唔會太衰。不過，就係有人喜歡死炒爛炒，結果跑輸大市。

炒慣股的人，是很難完全戒掉的，我的建議是將資本用三七或者二八的比例分開，細錢繼續聽「冧巴」、繼續炒，大錢則轉用比較王道的手法去投資。

買股後長揸，有時的確比較悶，我提議買股可以好似揸住把玄鐵寶劍一樣，慢慢出招。見那些H股大股低的時候，買一些，升的時候，例如升咗十幾二十巴仙，不妨沽一些。聽落好簡單，但執行不太易，一般人低的時候唔敢買，高的時候不願沽。

買股忌高追，宜低吸，即使認定係升市，都等回吐時才吸，例如隻萬科（2202），年頭一開就狂升，那時不能追，現時回吐了，與年初高位20.35元比較，現價大約18.38元，已經跌約一成，高追的話便要挨價。你沒有高追的話，等到萬科回深一些，例如去到17.5元左右的時候吸納一些，跌深一些，又買一些，待再上破高位的時候沽出，這種策略反而更易成功。