早兩日在網上見到網友Lost Confidence的留言，佢話 「聽陸SIR教導, 唔好高追, 調整先買, 有糊先食一半, 唔買雞股, 買H股大股, 學到陸SIR一半功力, 都應該有D收成」。網友Lost Confidence這幾句話，的確總結了我經常同大家講的買股心法。
我又記起一個故仔，去年9月和一個中學同學打完籃球，在回程時他問起我，話買股炒上炒落無乜得著，唔輸都偷笑咁款，我就花咗半個鐘，叫佢試吓用主要的錢，買2822(南方A50基金)或者2823(安碩A50基金)，在低位買吓，等佢升高咪沽吓，好過爛炒啲細股啦。後來同學同我講，佢要到11、12月先至諗明我講乜，雖然反應慢，結果都買咗，都有啲斬獲。
我觀察散戶的投資行為，發現他們有不少投資弊病，最典型的是喜歡搵冧巴炒細股，博買中就升10倍。在過程中可能也會買中，固然不會賺到10倍，但賺三、四成的已經不俗啦。不過，在不斷的買買賣賣，炒來炒去，最後都係輸番晒。我之前寫過幾本書，都係講這些細股背後，都有莊家，當中有很多投資陷阱，專陰老散。
要避開這些投資陷阱，最簡單的就是還原基本步，要搞好自己買股的心法。其實Lost Confidence講得很好，如果唔識買股，就唔好買雞股，要買指數股，或者H股大股，就可以輸少好多。我形容買三、四線股博發達的人，便好似練《葵花寶典》，我唔敢話一定唔得，夠膽引刀自宮，或者真係可以成為一代武林高手，不過，一般人的結果都係自宮之後，只係自宮咗。其實，練《葵花寶典》，似快實慢，很多時候是賣《葵花寶典》的賺了錢，練《葵花寶典》的卻沒有得著。
相對嚟講，我教大家的心法，就玄門正宗少少。就好似《九陽神功》入門版咁，睇落有點鈍，招式（冧巴）又唔多，過程有點悶，唔多出彩。不過，如果跟得到的話，卻會有相當的斬獲。我聽到有不少散戶話，跟了這個心法幾年，買股開始有錢贏。對此，我不無驚訝：原來很多人買股都係輸錢！按道理，投資股票，雖然股市上上落落，但睇住個指數，應該唔會輸錢。例如你在這10年、8年間買股，由恆指低位買上來，都已經升了三、四成！每年又有兩厘幾息，即使你買盈富基金（2800），都應該唔會太衰。不過，就係有人喜歡死炒爛炒，結果跑輸大市。
炒慣股的人，是很難完全戒掉的，我的建議是將資本用三七或者二八的比例分開，細錢繼續聽「冧巴」、繼續炒，大錢則轉用比較王道的手法去投資。
買股後長揸，有時的確比較悶，我提議買股可以好似揸住把玄鐵寶劍一樣，慢慢出招。見那些H股大股低的時候，買一些，升的時候，例如升咗十幾二十巴仙，不妨沽一些。聽落好簡單，但執行不太易，一般人低的時候唔敢買，高的時候不願沽。
買股忌高追，宜低吸，即使認定係升市，都等回吐時才吸，例如隻萬科（2202），年頭一開就狂升，那時不能追，現時回吐了，與年初高位20.35元比較，現價大約18.38元，已經跌約一成，高追的話便要挨價。你沒有高追的話，等到萬科回深一些，例如去到17.5元左右的時候吸納一些，跌深一些，又買一些，待再上破高位的時候沽出，這種策略反而更易成功。
陸羽仁
** 博客文章文責自負,不代表本公司立場 **
我經常覺得股市專玩叻仔。自覺好精明，眼光獨到，經常進進出出炒股的「叻仔」，其實唔容易贏錢。有時反而一些鈍鈍地、笨笨地，睇長線的「蠢仔」，仲容易在股市獲利。上星期我教大家揸住把玄鐵重劍---中國海外（688），低位買下，見高位又沽下去賺錢。中國海外最近由高位回落，仍未到可吸納水平，要有耐性等等。
今期，我想與大家講講一個更加「笨」的方法，就係如何將閒置資金買燃汽股。紐約原油價格由半年前高位的每桶107美元，暴跌到現在的大約48美元，我之前講過，等油價再跌深一些，先至係時候吸納油汽股。而油股的典型代表係中國海洋石油（883），因為這是一家比較純粹的採油公司，所以理論上對油價變化會比較敏感；而燃汽股則以昆侖能源（135）係比較大隻的公司。
如果你係叻仔一名的話，可以等候油價跌到底，或者接近底部的時候，才買入中海油或者昆侖能源。但我估許多巴士報讀者都不是活躍的股市投資者，他們想投資，但沒有太多時間留意油價走勢。如果他們希望好似我講嘅，揸番把玄鐵重劍賺吓錢，可以點做呢？
如果大家手上有閒置資金，例如放在銀行無乜息收，或者只做吓人仔存款，我覺得可以利用一下這些閒錢做長線投資。我覺得一個鈍鈍地、笨笨地的方法可以考慮，就係分段慢慢買入昆侖能源。
昆侖能源1年圖
昆侖能源3年圖
昆侖能源的股價與石油及天然氣價格很有關係，大家可以睇睇昆侖能源的5年圖及1年圖，2013年頭上穿過高位17元樓上，一年前在13元上下水平橫行，現時跌到大約7.58元，都跌得好傷。她的下跌與天然氣價格急插有關，天然氣5年前高峰時每加侖7.5美元，其後反覆回，但過去3年大部份時間在4美元多的水平徘徊，波幅比昆侖能源更細，但去年10月開始急插，近期已經跌到2.847美元。市場對天然氣價格的分析和油價一樣，覺得仍未跌完，有些更睇得好淡，估計會大插至2美元。
天燃氣價格1年圖
天燃氣價格5年圖
能源是生產的必需品，石油與天然氣更係當中的關鍵。我有個大膽假設，石油與天然氣價錢，急插後都會回升，即使上唔番往日高位，亦會去番中等的價錢水平，而不是插低後升不番上去。例如石油去番60、70美元，天然氣升番上大約3個幾美元，呢啲都係中等水平。石油及天然氣價格或許還會愈跌愈深，但不會長期留在低位。我的建議是如果大家有些閒錢放在銀行，本來就不是用作積極投資的資金，我形容是「笨錢」，可以用來分段吸納昆侖能源。例如將資金分成5段，每一個月買一注，慢慢收集，每個月見到報紙話油價跌的日子，氣價唔妨好，就係那個月入貨的日子，一直買到年中。另一個做法是每低1元一注，現價7.5元、7.6元一注，6.5元一注，5.5元一注，4.5元一注。無論那一個方法，都不用太快太心急入晒。
以按月買的笨人方法為例，風險在於汽價可能會像分析最極端的睇法，跌到只有2美元，你買齊晒，股價還再跌。至於更大的危險，就係全球進入長期通縮，經濟在頗長一段時間都會低迷，對能源需求減少，氣價一跌不升。但我相信經濟總有周期，能源價格亦會有上落，一跌不升的機會好細。這樣做長線得的機會較大，我覺得在這未來的半年間買了昆侖能源，三年以後，股價將會比現時高。昆侖現價市盈率8.9倍，息率3厘，股價較便宜，若果買入後唔理股價變動，仍比銀行收息好。這樣做雖然過程慢，方法有點笨，也是一種投資。
最係提提大家，這個方法不適合時常炒股的人參考，因為炒股的叻人是應該等到油價插到最低的時候，分一兩注買入的，不是上述提到的不計較股價慢慢地分段買入，我只係覺得咁樣笨笨地投資，比放錢在銀行好啫。
