笨笨地投資法‏

我經常覺得股市專玩叻仔。自覺好精明，眼光獨到，經常進進出出炒股的「叻仔」，其實唔容易贏錢。有時反而一些鈍鈍地、笨笨地，睇長線的「蠢仔」，仲容易在股市獲利。上星期我教大家揸住把玄鐵重劍---中國海外（688），低位買下，見高位又沽下去賺錢。中國海外最近由高位回落，仍未到可吸納水平，要有耐性等等。 

今期，我想與大家講講一個更加「笨」的方法，就係如何將閒置資金買燃汽股。紐約原油價格由半年前高位的每桶107美元，暴跌到現在的大約48美元，我之前講過，等油價再跌深一些，先至係時候吸納油汽股。而油股的典型代表係中國海洋石油（883），因為這是一家比較純粹的採油公司，所以理論上對油價變化會比較敏感；而燃汽股則以昆侖能源（135）係比較大隻的公司。

如果你係叻仔一名的話，可以等候油價跌到底，或者接近底部的時候，才買入中海油或者昆侖能源。但我估許多巴士報讀者都不是活躍的股市投資者，他們想投資，但沒有太多時間留意油價走勢。如果他們希望好似我講嘅，揸番把玄鐵重劍賺吓錢，可以點做呢？

如果大家手上有閒置資金，例如放在銀行無乜息收，或者只做吓人仔存款，我覺得可以利用一下這些閒錢做長線投資。我覺得一個鈍鈍地、笨笨地的方法可以考慮，就係分段慢慢買入昆侖能源。

昆侖能源1年圖

昆侖能源3年圖

昆侖能源的股價與石油及天然氣價格很有關係，大家可以睇睇昆侖能源的5年圖及1年圖，2013年頭上穿過高位17元樓上，一年前在13元上下水平橫行，現時跌到大約7.58元，都跌得好傷。她的下跌與天然氣價格急插有關，天然氣5年前高峰時每加侖7.5美元，其後反覆回，但過去3年大部份時間在4美元多的水平徘徊，波幅比昆侖能源更細，但去年10月開始急插，近期已經跌到2.847美元。市場對天然氣價格的分析和油價一樣，覺得仍未跌完，有些更睇得好淡，估計會大插至2美元。

天燃氣價格1年圖

天燃氣價格5年圖

能源是生產的必需品，石油與天然氣更係當中的關鍵。我有個大膽假設，石油與天然氣價錢，急插後都會回升，即使上唔番往日高位，亦會去番中等的價錢水平，而不是插低後升不番上去。例如石油去番60、70美元，天然氣升番上大約3個幾美元，呢啲都係中等水平。石油及天然氣價格或許還會愈跌愈深，但不會長期留在低位。我的建議是如果大家有些閒錢放在銀行，本來就不是用作積極投資的資金，我形容是「笨錢」，可以用來分段吸納昆侖能源。例如將資金分成5段，每一個月買一注，慢慢收集，每個月見到報紙話油價跌的日子，氣價唔妨好，就係那個月入貨的日子，一直買到年中。另一個做法是每低1元一注，現價7.5元、7.6元一注，6.5元一注，5.5元一注，4.5元一注。無論那一個方法，都不用太快太心急入晒。

以按月買的笨人方法為例，風險在於汽價可能會像分析最極端的睇法，跌到只有2美元，你買齊晒，股價還再跌。至於更大的危險，就係全球進入長期通縮，經濟在頗長一段時間都會低迷，對能源需求減少，氣價一跌不升。但我相信經濟總有周期，能源價格亦會有上落，一跌不升的機會好細。這樣做長線得的機會較大，我覺得在這未來的半年間買了昆侖能源，三年以後，股價將會比現時高。昆侖現價市盈率8.9倍，息率3厘，股價較便宜，若果買入後唔理股價變動，仍比銀行收息好。這樣做雖然過程慢，方法有點笨，也是一種投資。

最係提提大家，這個方法不適合時常炒股的人參考，因為炒股的叻人是應該等到油價插到最低的時候，分一兩注買入的，不是上述提到的不計較股價慢慢地分段買入，我只係覺得咁樣笨笨地投資，比放錢在銀行好啫。

陸羽仁

** 博客文章文責自負,不代表本公司立場 **

新年頭講投資，我喜歡講方法，散戶鐘意問冧巴，有時都要有啲折衷。 

有網友問起，陸生你成日講來講去得個幾個冧巴，唔係405(越秀房託)，就係2828(恒生H股指數基金)、2823(安碩A50基金)或者133(招商中國基金)，你唔悶我地都悶啦，有無多啲冧巴可以提供呀? 或者密手啲買賣呀？

我首先自辯一下，我估巴士的報的網友未必個個咁經常炒股，俾個冧巴你，正常唔對路假設你跌10%已識走，點知你跌的時候唔識走，又全副身家買落一隻股度，咁點算？所以我從最大路的股票出發，講吓組合就算啦。千祈唔好以為呢啲組合無用，買得夠平，坐住唔放已經掂。

唔知大家有無睇過神鵰俠侶，主角楊過去到劍聖獨孤求敗的劍塚，知道佢三十歲前主要用好鋒利的「紫薇軟劍」。三、四十歲用「玄鐵重劍」，重劍無鋒，大巧不工，恃之橫行天下。四十歲後，不滯於物，草木竹石均可為劍，只用木劍。

你睇全世界投資最富有的股神巴菲特，就成日叫人買指數股，佢自己都係低買大股長揸，等如攞把木劍去殺人。我教你地買的幾隻指數基金，或房託或中國基金，若不是我覺得佢地在低位，就係有好深的資產折讓，呢啲就係木劍，發揮得好，已經好高境界。

但一般人唔欣賞木劍，唔鍾意佢唔夠利，鐘意炒吓細股，好似「紫薇軟劍」咁，呢啲係大上大落的股票，用得好好易斬死人，用不好斬死埋自己。

見大家唔鐘意木劍，我又覺得你地未必識用「紫薇軟劍」，所以我就中間落墨，搵把「玄鐵重劍」俾你，鈍鈍地，都可以殺吓人架啦。方法係搵一啲穩定又有上落波幅的大股，炒上落，一年走得幾轉，都幾和味架。我想舉的例子係內房大股中國海外(688)，佢舊年有8次回落再上升，1月跌到20元再上，2月跌到19.5元再上，3月見17.5元再上，5月見17.8元再上，6月見18.5元再上，10月見19.7元再上，11月見20.2元再上，12月見21元再上。若然每次在近低位撈到，反彈10%就走，都好和味。

現實上要捉晒呢8次低位唔易，有較大機會未跌到底就買咗，但買貴咗少少，等可以等佢彈番上有10%時就走，大體上可以食4次左右，加埋複式都有50%回報。

  

細心睇688個圖，佢去年上半年走勢係反覆向下試底，下半年就反覆向上。估計今年上半年佢有機會沿著上升軌反覆向上，底位一級級上移，如假設不錯，佢12月低位大約21元左右，接著上試高位會上27元之上，然後回落時向下的低位會比上次的21元高，大約22.7元左右，在這些位置吸納，等上破高位時沽出。若然唔食咁盡，沽貨就唔睇圖，唔理佢破唔破高位，定死入貨價升10%就沽，咁雖然可能會賺少啲，但就較大機會食到。

若走勢同假設唔同，就要小心隻股票轉咗勢，例如假設佢可以上破上次高位26.3元，結果升到26.3元位置不穿高位就回落，出現雙頂，甚至唔到就回，就可能見頂轉勢，開始一個下降軌。又例如估佢回落時不會跌到上次低位21元，點知佢跌到21元仲穿埋，就出現一個向下突破走勢，更確認佢開始一個下降走勢。咁雖然仍然可以低買高沽，就要估佢低位一級比一級低，下次要在較低位才吸納了。

中國海外都係十大內房之一，比較穩健，就算入錯咗，都可以守吓。若然一年走到三、四轉，每次執10%以上，不斷游水，都有可為。用呢個方法，都要不時睇吓中海外的股價圖，要有啲感覺，但就不用太貼市，有興趣的朋友，可以試試玩吓。