玄鐵重劍

新年頭講投資，我喜歡講方法，散戶鐘意問冧巴，有時都要有啲折衷。 

有網友問起，陸生你成日講來講去得個幾個冧巴，唔係405(越秀房託)，就係2828(恒生H股指數基金)、2823(安碩A50基金)或者133(招商中國基金)，你唔悶我地都悶啦，有無多啲冧巴可以提供呀? 或者密手啲買賣呀？

我首先自辯一下，我估巴士的報的網友未必個個咁經常炒股，俾個冧巴你，正常唔對路假設你跌10%已識走，點知你跌的時候唔識走，又全副身家買落一隻股度，咁點算？所以我從最大路的股票出發，講吓組合就算啦。千祈唔好以為呢啲組合無用，買得夠平，坐住唔放已經掂。

唔知大家有無睇過神鵰俠侶，主角楊過去到劍聖獨孤求敗的劍塚，知道佢三十歲前主要用好鋒利的「紫薇軟劍」。三、四十歲用「玄鐵重劍」，重劍無鋒，大巧不工，恃之橫行天下。四十歲後，不滯於物，草木竹石均可為劍，只用木劍。

你睇全世界投資最富有的股神巴菲特，就成日叫人買指數股，佢自己都係低買大股長揸，等如攞把木劍去殺人。我教你地買的幾隻指數基金，或房託或中國基金，若不是我覺得佢地在低位，就係有好深的資產折讓，呢啲就係木劍，發揮得好，已經好高境界。

但一般人唔欣賞木劍，唔鍾意佢唔夠利，鐘意炒吓細股，好似「紫薇軟劍」咁，呢啲係大上大落的股票，用得好好易斬死人，用不好斬死埋自己。

見大家唔鐘意木劍，我又覺得你地未必識用「紫薇軟劍」，所以我就中間落墨，搵把「玄鐵重劍」俾你，鈍鈍地，都可以殺吓人架啦。方法係搵一啲穩定又有上落波幅的大股，炒上落，一年走得幾轉，都幾和味架。我想舉的例子係內房大股中國海外(688)，佢舊年有8次回落再上升，1月跌到20元再上，2月跌到19.5元再上，3月見17.5元再上，5月見17.8元再上，6月見18.5元再上，10月見19.7元再上，11月見20.2元再上，12月見21元再上。若然每次在近低位撈到，反彈10%就走，都好和味。

現實上要捉晒呢8次低位唔易，有較大機會未跌到底就買咗，但買貴咗少少，等可以等佢彈番上有10%時就走，大體上可以食4次左右，加埋複式都有50%回報。

  

細心睇688個圖，佢去年上半年走勢係反覆向下試底，下半年就反覆向上。估計今年上半年佢有機會沿著上升軌反覆向上，底位一級級上移，如假設不錯，佢12月低位大約21元左右，接著上試高位會上27元之上，然後回落時向下的低位會比上次的21元高，大約22.7元左右，在這些位置吸納，等上破高位時沽出。若然唔食咁盡，沽貨就唔睇圖，唔理佢破唔破高位，定死入貨價升10%就沽，咁雖然可能會賺少啲，但就較大機會食到。

若走勢同假設唔同，就要小心隻股票轉咗勢，例如假設佢可以上破上次高位26.3元，結果升到26.3元位置不穿高位就回落，出現雙頂，甚至唔到就回，就可能見頂轉勢，開始一個下降軌。又例如估佢回落時不會跌到上次低位21元，點知佢跌到21元仲穿埋，就出現一個向下突破走勢，更確認佢開始一個下降走勢。咁雖然仍然可以低買高沽，就要估佢低位一級比一級低，下次要在較低位才吸納了。

中國海外都係十大內房之一，比較穩健，就算入錯咗，都可以守吓。若然一年走到三、四轉，每次執10%以上，不斷游水，都有可為。用呢個方法，都要不時睇吓中海外的股價圖，要有啲感覺，但就不用太貼市，有興趣的朋友，可以試試玩吓。

陸羽仁

** 博客文章文責自負,不代表本公司立場 **

又到聖誕，去一個部門的派對，幾個美女又問起我股票的問題，我提起在年頭建議她們買股，問她們回報多少，答案相當有趣，有人回報是22%，有人是0！ 

當日俾冧巴事件好有趣，應該是今年年初四開工時，4個美女去到我辦公室拜年，美女突然殺到，我大封一點的利是都無，手頭只是20蚊的利是，有點唔好意思，派完利是，佢地話錢放在銀行無乜利息，問起買乜股好，我就打開電腦的股價圖，細心話俾佢地聽。

幾個美女都不是資深股民，我不太敢建議個別股票，怕啲股票出問題時佢地唔識走，就講咗恒生H股指數基金(2828)和安碩A50基金(2823)，叫佢地留意，說到底這兩隻都係指數相關基金，衰極都有個譜，唔會害咗啲平時唔太買股的美女。

記得我當時話，今年股市都可能係上落市，你地唔使太心急買，等隻股插低啲的時候，分注買入，等佢地升到咁上下，分注沽出，咁都有機會賺10零個巴仙。(當然亦無估到內地股市升咁多，只預計是上落市)

我用電腦在兩隻股的股價圖上劃線，講吓底部大約係邊，上方大約去到邊，乜位可買，乜位可沽，講得非常具體。美女們都好好學，問咗好多問題，我一一解答，如是者講咗20分鐘，我都自覺足夠填補俾利是唔夠大封之債，叫做交足功課，美女們也滿載而歸。

到聖誕問起，四美中有兩人無買，有買者其中一人大約有10幾%回報(估計係走得快咗)，另一個買2823，就有22%回報。佢在3月入2823，入貨價8.3元和8.1元，揸住一直等到大升之後，在11月和12月分4注連環食糊，由食11%至35%，平均食22%。其實佢對上一年已聽我建議入咗啲2823，價錢貴一啲，若然只計今年入的貨，回報更高。佢都過咗一個開心聖誕。(2823現價11.8元，比她今年平均入貨價8.2元高咗44%！)

無買的同事有啲呻走寶，有人話係唔係我無講冧巴，亦有人記起我唔止有講冧巴，仲劃晒圖，講晒入貨策略。結論係唔買慣股票的朋友，有啲唔敢行動，所以無買。

我唔想建議人盲目買股，亂買好易輸錢。但若然不行動，當然無風險，但亦無回報。如何合理地冒險，係一個主要問題。我當時建議佢地買2828和2823，主要因為人人唔睇好，股價比較平，派息都ok，總好過放在銀行吧。