行動

又到聖誕，去一個部門的派對，幾個美女又問起我股票的問題，我提起在年頭建議她們買股，問她們回報多少，答案相當有趣，有人回報是22%，有人是0！ 

當日俾冧巴事件好有趣，應該是今年年初四開工時，4個美女去到我辦公室拜年，美女突然殺到，我大封一點的利是都無，手頭只是20蚊的利是，有點唔好意思，派完利是，佢地話錢放在銀行無乜利息，問起買乜股好，我就打開電腦的股價圖，細心話俾佢地聽。

幾個美女都不是資深股民，我不太敢建議個別股票，怕啲股票出問題時佢地唔識走，就講咗恒生H股指數基金(2828)和安碩A50基金(2823)，叫佢地留意，說到底這兩隻都係指數相關基金，衰極都有個譜，唔會害咗啲平時唔太買股的美女。

記得我當時話，今年股市都可能係上落市，你地唔使太心急買，等隻股插低啲的時候，分注買入，等佢地升到咁上下，分注沽出，咁都有機會賺10零個巴仙。(當然亦無估到內地股市升咁多，只預計是上落市)

我用電腦在兩隻股的股價圖上劃線，講吓底部大約係邊，上方大約去到邊，乜位可買，乜位可沽，講得非常具體。美女們都好好學，問咗好多問題，我一一解答，如是者講咗20分鐘，我都自覺足夠填補俾利是唔夠大封之債，叫做交足功課，美女們也滿載而歸。

到聖誕問起，四美中有兩人無買，有買者其中一人大約有10幾%回報(估計係走得快咗)，另一個買2823，就有22%回報。佢在3月入2823，入貨價8.3元和8.1元，揸住一直等到大升之後，在11月和12月分4注連環食糊，由食11%至35%，平均食22%。其實佢對上一年已聽我建議入咗啲2823，價錢貴一啲，若然只計今年入的貨，回報更高。佢都過咗一個開心聖誕。(2823現價11.8元，比她今年平均入貨價8.2元高咗44%！)

無買的同事有啲呻走寶，有人話係唔係我無講冧巴，亦有人記起我唔止有講冧巴，仲劃晒圖，講晒入貨策略。結論係唔買慣股票的朋友，有啲唔敢行動，所以無買。

我唔想建議人盲目買股，亂買好易輸錢。但若然不行動，當然無風險，但亦無回報。如何合理地冒險，係一個主要問題。我當時建議佢地買2828和2823，主要因為人人唔睇好，股價比較平，派息都ok，總好過放在銀行吧。

陸羽仁

** 博客文章文責自負,不代表本公司立場 **

周三晚在山光道馬會打毗餐廳食咗餐飯，有個老友請，佢話早幾個月睇咗我啲文話油價守唔到100美金咁貴，佢揸住隻和黃(0013)，和黃底下有赫斯基石油，怕油價跌影響和黃，就趁好價沽咗佢，而家和黃回咗十幾個巴仙，所以要請我食飯多謝我。 

我問老友買咗幾多，佢話唔係好多，百零萬錢咁啦。我話咁即係執咗10幾萬囉，咁要食你勁啲至得。可惜我今日要去驗身，呢個星期要好虛偽咁要食少啲，希望過關，唔可以食得太勁，否則真係要搵鵝肝做前菜。

老友問起我點解在巴士的報的專欄，講投資寫來寫去都係叫人買越秀房地產(405)或招商中國基金(133)或者恒生H股指數基金(2828)或者南方A50基金(2822)？會唔會覺得悶啲？

我話巴士的報的網友可能唔係慣常投資者，唔炒慣股，唔係咁貼市。我胡亂講冧巴，形勢變咗，佢地唔識走，就好大鑊。我經常講，對人講投資，應該好似中醫而不是西醫。我讀大學時通識科講起中西醫的不同理念，西醫用的藥物經過實驗和統計，一種藥對97%人有效，個個病人同一病癥可以用這種藥，問題係如果你剛好係那3%，就醫唔好。中醫睇每個病人都唔同，每個人有寒熱，配不同的藥，比較適應個別情況。

我胡亂俾一兩個冧巴，好似開西藥，有風險。只能開啲「太子都食唔壞」的藥穩陣啲。好似405，一年上落好多時只有10%，收7厘息，你唔理佢無大壞，即使跌落去收吓息亦唔會死。

話時話405呢啲房託，應該和息口呈反向相關，即係利息高，人地就沽佢，利息低，人地就買佢。近日市場利息下插，美國十年期債息跌到2.1厘(年頭高位是3厘)，因為一個通縮市令資金避入債券，債價上升債息就下跌，隻領匯(823)由年頭息高時的低位34.5元，上到而家48元。但隻405就無乜表現，年頭低位3.6元，而家3.84元，升得唔多。你話唔怕悶收吓息405都Ok，但若然怕悶，可以換馬。

我同老友講，而家中國美國通脹都咁低，美國好難加息加得太快，中國好可能加大放水力度救經濟，水頭充足，明年上半年股市都係繼續炒，所以即使穩陣派，都可以換吓去內銀股如工行(1398)、建行(939)或招行(3968)，工行、建行全年合共派到6厘息以上，招行都派4.5厘，派息唔弱，萬一買完回咗都可以收吓息。進取少少，揸吓內銀可能快過405。